ՀՀ Տավուշի մարզպետարանից տեղեկացանք, որ մարզի առողջապահական համակարգի կադրային ներուժի համալրման եւ նորացման նպատակով ՀՀ Տավուշի մարզպետ Արմեն Ղուլարյանը համագործակցության առաջարկով դիմել է Երեւանի Մխիթար Հերացու անվան պետական բժշկական համալսարանի ռեկտոր Գոհար Քյալյանին: Տավուշ է այցելել համալսարանի ուսումնական մասով պրոռեկտոր Գեւորգ Յաղջյանը եւ հարցը քննարկել մարզպետի, մարզպետարանի առողջապահության եւ սոցիալական ապահովության վարչության պետ Կարինե Դովլաթբեկյանի, «Իջեւանի ԲԿ» ՓԲԸ-ի տնօրեն Հրաչյա Ներսիսյանի, «Իջեւանի ԱԱՊԿ» ՓԲԸ-ի տնօրեն Գրիգոր Նազինյանի հետ:
Կողմերը մտադիր են կնքել պայմանագիր, ըստ որի, վերջին կուրսում եւ վերամասնագիտացման փուլում գտնվող ուսանողի մասնագիտացումը իրականացվի անվճար, պայմանով, որ նա ավարտելուց հետո առնվազն 3 տարի աշխատի Տավուշում: Բացի այդ, համալսարանի աջակցությամբ առաջիկայում Իջեւանի բժշկական կենտրոնում նախատեսվում է ներդնել նաեւ հեռակառավարմամբ բժշկական ծրագիր, որը հնարավորություն կտա բուժող բժշկին անմիջապես խորհրդատվություն ստանալ ոչ միայն համալսարանական կլինիկայի, այլեւ, անհրաժեշտության դեպքում, Նյու Յորքի եւ Զալցբուրգի կլինիկաների մասնագետներից:
