«Շուշի» հիմնադրամի ղեկավար Բակուր Կարապետյանը օրերս կայացած ասուլիսում պատմեց, թե ինչպես են ծնվել իր «Սումգայիթյան ալիքներ» ֆիլմն ու նույն թեմայով գիրքը. «Որպես հեռուստատեսության աշխատող՝ ես այդ օրերին վերցրի տեսախցիկը եւ գնացի Սումգայիթ: Այնտեղ հարցազրույցներ ունեցա ջարդերից տուժածների եւ ականատեսների հետ, եղա 300-ից ավելի թալանված, այրված, խոշտանգման ենթարկված մարդկանց տներում, ինչի արդյունքում էլ ծնվեցին սումգայիթյան ջարդերի մասին պատմող տեսարանները, գիրքն ու «Սումգայիթյան ալիքներ» ֆիլմը»:
Հեղինակը վստահեցրեց, որ թե գրքում, թե ֆիլմում բացառապես իրական պատմություններ են: Բ. Կարապետյանը նշեց նաեւ, որ իր նկարահանած արխիվային նյութերից շատերն այսօր Ադրբեջանն օգտագործում է հակահայկական քարոզչության ժամանակ: Գրողն ասաց, որ սումգայիթյան ողբերգությունների վերաբերյալ 20 ֆիլմի սցենար ունի, սակայն դրանք չի կարողանում կյանքի կոչել՝ ֆինանսական միջոցների բացակայության պատճառով:
