«Եթե Ադրբեջանը պատրաստ է միջազգային անվտանգության երաշխիքներ տրամադրել հայ փախստականներին, այդ պարագայում ադրբեջանահայ համայնքը պատրաստ է վերադարձի, իսկ եթե ադրբեջանական կողմը դա բացառում է, ապա մենք նույնպես չենք հանդուրժի ադրբեջանցի թուրքերի վերադարձը՝ առանց մեր հիմնախնդիրների լուծման»,- երեկ լրագրողների հետ հանդիպման ժամանակ հայտարարել է Ադրբեջանահայերի ասամբլեայի նախագահ Գրիգորի Այվազյանը: Այսօր ամբողջ աշխարհում ապրում են մոտ կես միլիոն ադրբեջանահայեր, այդ թվում 360 հազարը՝ Հայաստանում: Նրանցից 82 հազարը ընդունել է Հայաստանի քաղաքացիություն:ՀՀ կառավարությունը Ադրբեջանից բռնագաղթած փախստականների բնակարանային խնդիրների լուծումն առաջնահերթ է համարում, սակայն այս տարվա պետբյուջեից այդ նպատակով գումար չի հատկացվել: Նախորդ տարի խնդրի լուծմանն ուղղվել էր 845 միլիոն դրամ:
