ՀՀ տնտեսության ակտիվացման համար անհրաժեշտ է այն դիվերսիֆիկացնել: Երեկ լրագրողների հետ հանդիպման ժամանակ նման կարծիք հայտնեց Համաշխարհային բանկի երեւանյան գրասենյակի ղեկավար Արիստոմենե Վարուդակիսը. «Համաշխարհային բանկը ողջունում է կառավարության քայլերը, սակայն անհրաժեշտ են ավելի վճռական քայլեր, որոնք կհանգեցնեն օլիգոպոլիան արմատախիլ անելուն»: 2010-ի հունվարին արձանագրված 2,2%-ոց տնտեսական աճը, ըստ Վարուդակիսի, դեռ չի նշանակում, որ ճգնաժամն ավարտվել է: Նրա վստահեցմամբ՝ Հայաստանը 3-4 տարուց կվերադառնա 2008թ. տնտեսական աճի մակարդակին: Նրա խոսքերով, ՀԲ-ն մեր երկրում 2010թ. արդյունքներով կանխատեսում է տնտեսության 2% աճ:
ՀԲ-ն 5 մլն դոլար վարկ կհատկացնի Հայաստանում «Սոցիալական ապահովության վարչարարություն» ծրագրի լրացուցիչ ֆինանսավորման համար, 7 մլն դոլար էլ կհատկացվի «Հայաստանում սոցիալական ներդրումների հիմնադրամ» ծրագրին:
