«Առավոտի» փետրվարի 23-ի համարում տպագրված «Հերթական անգիտությունը» հոդվածում տեղեկացրել էինք, որ մշակույթի նախարարության www.mincult.
am կայքում փետրվարի 19-ին զետեղվել է հաղորդագրություն՝ «Փետրվարի 19-ը ՅՈՒՆԵՍԿՕ-ն հայտարարել է գիրք նվիրելու օր», մինչդեռ ՅՈՒՆԵՍԿՕ-ի պաշտոնական կայքում՝ www.unesco.
org-ում զետեղված փետրվար ամսվա ժամանակացույցում նման բան չկար: Հոդվածում փաստել էինք նաեւ, որ թարգմանական բազմաթիվ միջոցառումներ ֆինանսավորած նախարարությունում չկա միջազգային պաշտոնական կայքերից գրագետ թարգմանություն իրականացնող որեւէ մեկը, ով կկարողանա ապահովել ճշգրիտ տեղեկատվություն:
Հոդվածի առնչությամբ Հայաստանի ազգային գրադարանից ստացել ենք պարզաբանում, որտեղ գրված է. «Թյուրիմացությունն առաջացել է Ազգային գրադարանի կողմից ՀՀ մշակույթի նախարարությանը ներկայացրած փետրվարի 19-ին նվիրված միջոցառումների ծրագրից, որտեղ նշված է՝ ՅՈՒՆԵՍԿՕ: Վրիպակի համար խնդրում ենք ձեր ներողամտությունը»: Ամեն դեպքում, սա չի թեթեւացնում մշակույթի նախարարության մեղքը. նրանց բազմաթիվ աշխատակիցներից որեւէ մեկը կարող էր այցելել www.unesco.org, որը, ի դեպ, ռուսերեն տարբերակ էլ ունի, եւ ճշտել՝ գերատեսչության կայքում տեղադրվելու համար ուղարկված տեղեկատվությունը որքանով է հավաստի:
