Ֆրանսիան Էստոնիային, Լատվիային եւ Լիտվային հավաստիացրել է, որ Ռուսաստանին վաճառվող «Mistral» ուղղաթիռակիրները ռազմական տեխնոլոգիաներով հագեցված չեն լինելու: «Newsru»-ի մատուցմամբ, Ռուսաստանի հետ կնքված գործարքում այդ պայմանի առկայության մասին հայտնել է բալթյան հանրապետություններ այցելած Ֆրանսիայի եվրոպական գործերով պետքարտուղար Պիեր Լելուշը (նկարում): Բալթյան երկրների ղեկավարներին նա հավաստիացրել է, թե խոսքը գնում է բացառապես «քաղաքացիական նավերի մասին, որոնք որեւէ զինվածություն չեն ունենալու»: Բացի այդ, Լելուշը նաեւ հայտարարել է, թե ռուսական կողմից այդ նավերը ձեռք բերելու մասին պաշտոնական պատվեր դեռեւս չի ստացվել: Հիշեցնենք, որ բալթյան երկրները ֆրանսիական արտադրության ուղղաթիռակիր «Mistral» նավերի ձեռքբերումը Ռուսաստանի կողմից համարել էին որպես իրենց երկրների անվտանգությանը սպառնացող հանգամանք: Ավելի վաղ նման մտահոգություն էր հայտնել նաեւ Վրաստանի նախագահ Սահակաշվիլին՝ հայտարարելով, թե նման նավեր ունենալով, Ռուսաստանը հաշված ժամերի ընթացքում կարող է ցանկացած երկիր գրավել:
