ԱՐԿԻ ՀԵՏՔԵՐՈՎ
Երեկ ՀՀ ԱԻՆ փրկարար ծառայությունը եւ ոստիկանությունը ահազանգ էր ստացել Հայաստանի պետեկամուտների կոմիտեում տեղադրված ռումբի կապակցությամբ: Փրկարարների ուժերով կոմիտեի աշխատակիցները դուրս են եկել աշխատասենյակներից: Օրվա երկրորդ կեսին պարզվել է, որ ահազանգը եղել է կեղծ:
ՊԱԼԱՏԸ ԴԱՏԱՊԱՐՏՈՒՄ Է
Հայաստանի Հանրապետության փաստաբանների պալատը հաղորդագրություն է տարածել փաստաբան Արա Զոհրաբյանից եւ փաստաբանական կազմակերպություն հանդիսացող «Սրետենկա-Կոնսուլ» ՍՊ ընկերությունից՝ ՀՀ ոստիկանության Էրեբունու քննչական բաժնի քննիչի կողմից փաստաբանի համակարգիչն առգրավելու փորձի կապակցությամբ: Պալատը դատապարտում է իրավապահ մարմինների բոլոր այն գործողությունները, որոնք ուղղված են փաստաբանի գործունեության միջամտությանը, այդ թվում՝ նաեւ փաստաբանական գաղտնիք պարունակող տվյալների առգրավմանը:
«Փաստաբանը պարտավոր է պահպանել փաստաբանական գաղտնիքը, իսկ Հայաստանի Հանրապետության կառավարությունը միջազգային պայմանագրով պարտականություն է ստանձնել ապահովել փաստաբանի եւ նրա հաճախորդի ցանկացած հարաբերությունների ու խորհրդատվությունների գաղտնի բնույթը՝ նրանց մասնագիտական առնչությունների շրջանակներում»,- ասվում է հաղորդագրության մեջ:
