«Նաշա Ռաշա» ծրագիրը մեղադրվում է տաջիկների դեմ բարոյական գենոցիդի համար
![\"\"](\"https://www.aravot.am/2010/aravot_arm/February/26/p6.jpg\")
«Տաջիկստանի աշխատանքային միգրանտներ» համառուսական հասարակական շարժման նախագահ Կարոմատ Շարիպովը դիմել է ՌԴ տեղեկատվական տեխնոլոգիաների եւ զանգվածային լրատվամիջոցների վերահսկողությամբ զբաղվող Դաշնային ծառայությանը եւ ՌԴ գլխավոր դատախազին՝ կապված «Նաշա Ռաշա» ծրագրի հետ:
Շարիպովը, որը գլխավորում է «Տաջիկստանի աշխատանքային միգրանտներ» շարժումը,ասել է, թե «Նաշա Ռաշա» նախագծի ղեկավարության գործողությունները գնահատում է որպես տաջիկ ժողովրդի բարոյական գենոցիդ»: Նա պահանջում է տաջիկ ժողովրդից հրապարակային ներողություն հայցել: Վերոհիշյալ պահանջները արհամարհելու դեպքում, տեսանյութերը կներկայացնի ՌԴ գլխավոր դատախազություն:
Դիմումում նա նշել է, որ Ջամշուդ եւ Ռավշան խոպանչիների կերպարները «ամբողջովին խեղաթյուրում են մարդկային որակները եւ վիրավորում տաջիկ ժողովրդին»:
Ինչպես փոխանցում է «Ռեգնումը», Կարոմատ Շիրիպովը նշում է, որ «Նաշա Ռաշայի» հեղինակները ծաղրում են ոչ միայն տաջիկներին, այլ նաեւ Տաջիկստանի քաղաքացու անձնագիրը:
Հիշեցնենք, որ «Նաշա Ռաշա» հեռուստածրագրի բազմաթիվ տարիների գոյության ընթացքում, Մոսկվան ոչ մի անգամ չի արձագանքել պաշտոնական Դուշանբեի բողոքներին: Եթե ռուսական իշխանությունները այս անգամ էլ չարձագանքեն միգրանտների դիմումին, շարժումը նպատակ ունի հայցով դիմել Ստրասբուրգի մարդու իրավունքների եվրոպական դատարան:
Նշենք, որ ներկայումս ՌԴ-ում բնակվում է մոտ 1 մլն Տաջիկստանի քաղաքացի: Իսկ մի քանի շաբաթ առաջ ռուսական մամուլը տեղեկացրել էր, որ տաջիկ խոպանչիներից մեկին մարմնավորող Միշա Գալուստյանը պարբերաբար մահվան սպառնալիքներ է ստանում տաջիկներից:
