2009 թվականի հունիսին անվտանգության խորհուրդը քննարկել եւ հավանության է արժանացրել Հայաստանի տեղեկատվական անվտանգության հայեցակարգը, իսկ հանրապետության նախագահն իր կարգադրությամբ հաստատելով այն՝ ձեւավորել է տեղեկատվական անվտանգության հայեցակարգի դրույթներով նախատեսված ծրագրերի իրականացումը համակարգող միջգերատեսչական հանձնաժողով՝ տալով կոնկրետ առաջադրանք՝ լուծել այս ոլորտում կուտակված խնդիրները: Միջգերատեսչական հանձնաժողովը, որը ղեկավարում է Ազգային անվտանգության խորհրդի քարտուղար Արթուր Բաղդասարյանը, երեկ գումարել է անդրանիկ նիստը:
Ամփոփելով 2009 թվականին կատարված աշխատանքները՝ հանձնաժողովն արձանագրել է, որ համաշխարհային հեռահաղորդակցության միության ընդհանուր զարգացման ինդեքսով Հայաստանում գրանցվել է որոշակի բարելավում, այդուհանդերձ՝ կան լուծման կարոտ բազմաթիվ խնդիրներ: Ա. Բաղդասարյանը նշել է, որ տեղեկատվական անվտանգությանն առնչվող բոլոր հարցերը կարեւոր ռազմավարական նշանակություն ունեն. «Սա վերաբերում է ոչ միայն մեր երկրի ներսում տեղեկատվական անվտանգության մակարդակը բարձրացնելուն, այլեւ տեղեկատվական անվտանգության ոլորտում այնպիսի բարեփոխումներ իրականացնելուն, որոնք հնարավորություն կտան թե՛ օրենսդրական, թե՛ ինստիտուցիոնալ իմաստով ունենալ այնպիսի մակարդակ, որը կհամապատասխանի միջազգային չափանիշներին»:
