![\"\"](\"https://www.aravot.am/2010/aravot_arm/February/26/p4.jpg\")
«Հայրենիք ու պատիվ» կուսակցության քաղխորհրդի նախագահ Գառնիկ Մարգարյանը գտնում է, որ ՀԱԿ-ն ավելի կոնկրետ եւ գործնական քայլերի պետք է անցնի:
– Նախորդ օրն Ազգային ժողովում առաջին ընթերցմամբ ընդունվեց «Միջազգային պայմանագրերի մասին» օրենքում լրացում նախատեսող օրինագիծը, որով սահմանվում է մինչեւ ուժի մեջ մտնելը ստորագրված պայմանագրերի դադարեցման ընթացակարգը, եւ որը, մասնավորապես, առնչվում է հայ-թուրքական արձանագրությունների դադարեցման հնարավորությանը։ Դուք ոգեւորվա՞ծ եք հայ-թուրքական հարաբերությունների կարգավորման հնարավոր տապալումից, քանի որ ի սկզբանե «դեմ» էիք այդ հարաբերությունների կարգավորմանը:
– Այո, ի սկզբանե դեմ էի, բայց ի սկզբանե էլ ասում էի, որ այդ գործընթացը մտնելու է փակուղի: Թուրքիան եւ թուրքական իշխանությունները երբեւէ պատրաստ չեն եղել Հայաստանի եւ հայ ժողովրդի նկատմամբ ինչ-որ հարցերում դիրքորոշումների փոփոխության գնալ: Մեր ռեժիմը վաղուց պետք է դա հասկանար եւ չգնար արձանագրությունների ստորագրմանը: Ամբողջ ցավը նրանում է, որ այս ռեժիմն Արեւմուտքի ճնշումներին է ենթարկված, եւ այս ամբողջը դրա արդյունքն էր: ԱԺ-ի քննարկումներն էլ եթե ամփոփենք՝ այս ողջ գործընթացը մեկ նախադասությամբ կարելի է բնութագրել՝ պարտվողական, հակահայկական, հակապետական քաղաքականություն: Եվ այդ Հանրապետական է, թե ի՞նչ կուսակցություն է, որի անդամները բարբաջում են, թե այս բոլորը հանուն հայ ժողովրդի է՝ սա առնվազն դավաճանություն է:
– Հայ ազգային կոնգրեսը, որին անդամակցում է նաեւ ձեր ղեկավարած կուսակցությունը, արդեն երկու տարի է՝ խոսում է հակապետականության, հակահայկականության մասին, իշխանություններին անվանում է ավազակապետություն, բայց նրանք բավականին բարեհաջող շարունակում են իրենց գործունեությունը:
– Այո, Հայ ազգային կոնգրեսն ավելի շատ գործ պետք է անի: Ժամանակը հասունացել է, եւ ժողովուրդը, երկիրը, ազգը, երկրի շահերը պահանջում են ավելի ակտիվ եւ կոնկրետ գործողությունների գնալ: Գործողությունների «ռեզյումեն» հետեւյալն է՝ պետք է իշխանափոխություն: Ուրիշ ճանապարհ չկա:
– Իշխանափոխություն՝ ի՞նչ ճանապարհով:
– Գիտեք, բոլոր ճանապարհներն էլ արդարացված են, եթե դա նպաստավոր է երկրի, ազգի գոյատեւման համար:
– Կոնգրեսում նախնական խորհրդակցություններ եղե՞լ են մարտի 1-ին կայանալիք հանրահավաքի վերաբերյալ, դուք հնարավորություն ունեցե՞լ եք բարձրաձայնելու, որ հենց այդ հանրահավաքից պետք է սկսել ակտիվ գործողությունների փուլը:
– Նախորդ քաղխորհուրդների նիստերից մեկում ես ոչ միայն պնդել եմ, այլեւ առաջարկել եմ մեր տեսակետները՝ ճանապարհները, որոնցով պետք է անցնել ակտիվ գործողությունների:
– Դրանք արձագանք գտա՞ն եւ ինչպիսի՞:
– Որոշակի առումով դրական արձագանք եղավ, որովհետեւ, կարծես թե, միայն ես չէ, որ այդ կարծիքին եմ, այլ ՀԱԿ անդամ կուսակցություններից շատերի ղեկավարներն այդ կարծիքին են:
– Եթե ՀԱԿ-ը շարունակի պասիվ քաղաքական գործունեությունը, հնարավոր համարո՞ւմ եք նոր կառույցի ձեւավորումը:
– Նոր կառույցի ձեւավորում բացառում եմ, ինչպես նաեւ բացառում եմ, որ ՀԱԿ-ը կշարունակի գնալ այդ ճանապարհով: Համոզված եմ, որ գնալու է ակտիվացում, քանի որ ՀԱԿ-ում խելամիտ մարդիկ են, իրավիճակի գնահատականի եւ ժամանակների ընտրության հարցում շատ ճշգրիտ են:
– Դուք հավատո՞ւմ եք, որ Հայաստանում արտահերթ իշխանափոխություն կլինի:
– Գիտեք, հավատալը մի բան է, իրագործելն՝ այլ բան: Եթե դա չկայացավ՝ մեր ժողովրդի ուսերին շատ ծանր բեռ է լինելու: Հետեւաբար, արտահերթ ընտրությունները պարտադիր են, իսկ դրանց նախադրյալները ակնհայտ են:
– Մոտ ապագայում ի՞նչ իրավիճակ եք կանխատեսում Հայաստանի համար:
– Ես դեռ անցյալ տարվա համար էի կանխատեսել, բայց այժմ սոցիալական պայթյունի նախադրյալներն առկա են: Ձախողված են եւ արտաքին, եւ ներքին քաղաքականությունը, տնտեսական եւ սոցիալական ոլորտները, դեմոգրաֆիկ պատկերի մասին էլ չեմ խոսում: Սրանք արդեն ազգային անվտանգության եւ ազգի գոյատեւման հարցեր են:
