Վերջին օրերին հայաստանյան մարզական լրատվամիջոցների գլխավոր թեման Երեւանի «Փյունիկի» եւ Զամբիայի հավաքականի պաշտպան Էմանուել Մբոլայի՝ անգլիական «Տոտենհեմ» գրեթե գլուխ եկած տեղափոխությունն էր: Ընդ որում, նշվում էր, որ անգլիական ակումբն արդեն պատրաստ է ֆուտբոլիստի համար ակումբին վճարել 1 մլն ֆունտ: Սակայն երեկ «Regnum» գործակալությունը տեղեկացնում էր, որ 16-ամյա Մբոլան կարիերան «Տոտենհեմում» չի շարունակելու:
Ըստ ESA գործակալության, Մբոլան, իրոք, Անգլիայում է եղել եւ գտնվել է «Տոտենհեմի» տրամադրության ներքո: Սակայն Զամբիայի այն մարդիկ, ովքեր մեկ տարի առաջ Էմանուելին վաճառել են «Փյունիկին», որոշել են ֆուտբոլիստի վրա կրկնակի վաստակել: Օգտվելով այն փաստից, որ Մբոլան հաջող է խաղացել Աֆրիկայի գավաթի խաղարկությունում, նրանք ֆուտբոլիստին դիտմամբ երկար են պահել Զամբիայում, որից հետո, կապ հաստատելով անգլիական ակումբների հետ, հայտարարել են, թե ֆուտբոլիստի վաճառքի իրավունքն իրենց է պատկանում, իսկ «Փյունիկի» հետ պայմանագիրը կարելի է առանց խնդիրների չեղյալ համարել: Սակայն նրանց այդ արկածախնդրությունը հաջողություն չի ունեցել, քանի որ «Փյունիկը» անչափահաս ֆուտբոլիստի հետ պայմանագիրը կնքել է ՖԻՖԱ-ի բոլոր պահանջների համաձայն: «Տոտենհեմը» արագ է հասկացել, որ Մբոլայի պայմանագիրը «Փյունիկի» հետ լեգիտիմ է, սակայն արագ հրաժարվել է գաղափարից:
ESA-ի ներկայացուցիչը նաեւ տեղեկացրել է, որ Մբոլան այլ ակումբներից էլ, այդ թվում՝ նաեւ անգլիական, հրավերներ ունի, եւ իրենք հիմա բանակցում են ֆուտբոլիստի նոր տեղափոխման շուրջ:
