Աֆղանստանում ՆԱՏՕ-ի ռազմաօդային ուժերի կողմից Ուրուզգան գավառում իրականացված ավիացիոն հարվածների արդյունքում առնվազն 27 խաղաղ բնակիչ է սպանվել եւ եւս 14-ը վիրավոր է: Այդ մասին հայտարարել է Աֆղանստանի կառավարությունը: BBC-ի մատուցմամբ, կոալիցիոն ուժերը խաղաղ բնակիչներին տեղափոխող ավտոշարասյունը սխալմամբ ընդունել են որպես թալիբ գրոհայինների:
Հիշեցնենք, որ Ուրուզգան գավառը գտնվում է թալիբների վերահսկողության տակ: Միաժամանակ, Աֆղանստանում ամերիկյան զինված ուժերի կենտրոնական հրամանատարության ղեկավար Դեւիդ Պետրեուսը երկուշաբթի օրը հայտարարել է, թե Մարջա քաղաքի շրջանում ՆԱՏՕ-ի ուժերի ու Աֆղանստանի բանակի համատեղ գործողությունները թալիբների դեմ դեռ 12-18 ամիս կտեւեն: Հրամանատարն ասել է, թե՝ արդեն երկու շաբաթ ընթացող «Մաշտարակ» (թարգմանաբար՝ «Միասին») գործողությունը Աֆղանստանում թալիբ գրոհայինների դեմ սկսված ԱՄՆ նոր մարտավարության իրականացման միայն սկիզբն է:
