Ստամբուլի թաղամասերից մեկում գտնված զենքերի եւ փոքրամասնությունների դեմ ծրագրված գործողության հարցով դատվող 17 ամբաստանյալների դատավճռում շատ հետաքրքրական ու մտահոգիչ փաստաթղթեր կան: Ըստ «Նոյյան Տապան»-ի՝ ինչպես տեղեկացնում է «Մարմարան», ամենահետաքրքիր կետերից մեկն էլ այն է, որ գտնվել է Թուրքիայի մի քարտեզ, ուր մասնավորապես նշված է, թե որ նահանգներն են հավատացյալ, որ նահանգներն՝ անհավատ: Քարտեզի վրա հավատացյալ նահանգները ներկված են կանաչով, անհավատները՝ կարմիրով: Տարբեր գույներով ցույց է տրված, թե որտեղ կազմակերպված հավաքատեղիներ կան: Նշված են նաեւ ոչ մուսուլմանների անունները, հասցեները, նրանց հավաքատեղիները, որտեղ ժողովներ են գումարվում: Քարտեզի վրա տեղեկություններ կան նաեւ այն զինվորական միավորումների մասին, որոնք թույլ եւ անվստահելի են, եւ կարեւոր հանձնարարություններ չարժե տալ: Մասնավոր բաժիններ կան քրիստոնյա միսիոներների եւ աղանդների մասին: Ճշտված են նրանց հավաքատեղիների հասցեները:
