Թուրքիայում դատախազ է կալանավորվել

Փետրվարի 16-ին թուրքական ոստիկանությունը խուզարկություն է իրականացրել Էրզինջանի (Երզնկա) նահանգային գլխավոր դատախազ Իլհան Ջիհաների բնակարանում եւ աշխատավայրում, ապա ձերբակալել է վերջինիս: Հատուկ գործերով դատախազ Օսման Շանալը Ջիհաներին (նկարում) ձերբակալման հրաման է արձակել «Էրգենեկոնի» անդամ լինելու եւ «պաշտոնեական դիրքը չարաշահելու» մեղադրանքով: news.am-ի մատուցմամբ, ձերբակալված նահանգային գլխավոր դատախազը տեղափոխվել է Էրզրում, որտեղ էլ հարցաքննվելու է: Հիշեցնենք, որ «Էրգենեկոնը» ենթադրյալ ահաբեկչական կազմակերպություն է, որը նախատեսել էր կազմակերպել մի շարք սպանություններ, երկրում ստեղծել քաոսային իրավիճակ եւ, օգտվելով առիթից, Թուրքիայում հեղաշրջում իրականացնել: Մասնավորապես, հայտնի է դարձել, որ խմբավորման անդամները ծրագրել էին սպանել Պոլսո հայոց պատրիարք Մեսրոպ Մութաֆյանին, Սեբաստիայի հայ համայնքի առաջնորդին, ալեւիների առաջնորդին, Թուրքիայի վարչապետ Էրդողանին:
Ջիհաները ներկայիս պաշտոնին անցել էր 2007թ.-ին: Նրա հետաքրքրության ոլորտում անմիջապես հայտնվել էր իշխող «Արդարություն եւ զարգացում» կուսակցության կրոնական հենքը հանդիսացող Գյուլենի իսլամական միությունը, որի նկատմամբ նա հետաքննություն էր սկսել: