«Հայկական ժամանակ» օրաթերթի գլխավոր խմբագիր Նիկոլ Փաշինյանի գործով մեղադրող Հարություն Հարությունյանը բողոք է ներկայացրել վերաքննիչ քրեական դատարան: Մեղադրողը պահանջում է մասամբ բեկանել Կենտրոն եւ Նորք-Մարաշ վարչական շրջանների ընդհանուր իրավասության դատարանի հունվարի 19-ի դատավճիռը:
Մասնավորապես, 2007թ. հոկտեմբերի 23-ին «Իշխանության ներկայացուցչի նկատմամբ կյանքի եւ առողջության համար ոչ վտանգավոր բռնություն գործադրելու» մեղադրանքով արդարացման դատավճիռ կայացնելով, ըստ մեղադրողի, դատարանը թերի է գնահատել նախաքննությամբ եւ դատաքննությամբ ձեռք բերված ապացույցները: Մեղադրանքը, մեղադրողի կարծիքով, ամբողջությամբ հաստատված է, ուստի նշված հոդվածով պետք է նույնպես կայացվեր մեղադրական դատավճիռ:
