«Ի՞նչ կասեք Ադրբեջանի ԱԳՆ խոսնակ Էլհան Պոլուխովի պնդումների կապակցությամբ, թե ԼՂՀ Շահումյանի, Մարտակերտի եւ Մարտունու շրջանները Ադրբեջանի մաս են կազմում»: Պատասխանելով panorama.am–ի այս հարցին՝ ՀՀ ԱԳՆ լրատվամիջոցների հետ կապի բաժնի վարիչ Տիգրան Բալայանն ասաց. «Հայտարարելով Լեռնային Ղարաբաղի Շահումյանի, Մարտակերտի եւ Մարտունու շրջանների Ադրբեջանին պատկանելիության մասին՝ այդ երկրի ԱԳՆ-ն փորձում է խուսափել այդ տարածքներում Ադրբեջանի կողմից ԼՂ-ի դեմ իրականացված ագրեսիայի արդյունքում էթնիկ զտումների ու օկուպացիայի համար պատասխանատվությունից: Տարօրինակ կլիներ, եթե ադրբեջանական կողմը գոնե մեկ միջազգային իրավական փաստաթուղթ ներկայացներ, որը թույլատրում է էթնիկ զտումներ կատարել՝ դա արդարացնելով իբր թե սեփական տարածքում” դրանց իրականացմամբ»:
