Լույս է տեսել «Գործք» իրավատեղեկատվական ամսագրի անդրանիկ համարը: Գլխավոր խմբագիրը տնտեսագիտության թեկնածու Արթուր Սարգսյանն է: Ամսագրի առաջաբանում Ա. Սարգսյանը տեղեկացնում է, որ ամսագրի 72 էջերում տեղ են գտնելու պետություն-գործատու-աշխատող եռակողմ հարաբերությունները, աշխատաշուկայի հետ կապված պարզաբանումները, հարկային դաշտը կարգավորող օրենքները եւ դրանց մեկնաբանությունները. «Ամսագրի էջերում կբախվեն գիտնականների եւ պետական կառավարման մարմինների տեսակետները, բանավեճի մեջ կմտնեն գործազուրկը եւ զբաղվածության պետական ծառայության աշխատակիցը, գործատուն եւ արհմիութենական կազմակերպությունը: «Գործքը» կլինի գործատուների միջեւ արտադրական մշակույթի փոխանակման յուրահատուկ միջոց»:
Մասնագիտական այս հանդեսում տեղ են գտնելու լրագրողական հետաքննություններ, դատարաններում քննվող աշխատանքային եւ հարկային վեճեր:
Պարբերաբար լինելու են «Աշխատանքային եւ հարկային օրենսդրության մեջ օգտագործվող տերմինների բացատրական բառարան», «Ստուգիր ինքդ քեզ, կամ՝ բաց դռներ», «Աշխատանք չստանալու 50 պատճառ» խորագրերը:
