Ֆինլանդիայի բնապահպանական գերատեսչությունը հավանություն է տվել «Հյուսիսային հոսք»՝ «Nord Stream» գազատարի կառուցմանը, այդպիսով վերացնելով այդ նախագծի իրականացման համար ստեղծված վերջին խոչընդոտն ու կանաչ լույս վառելով դրա կենսագործման համար: BBC-ին տեղեկացնում է, որ «Nord Stream» գազատարը կոչված է դիվերսիֆիկացնելու ռուսական գազը՝ Եվրոպա արտահանելու ճանապարհները: Հիշեցնենք, որ, այդ նախագծի համաձայն, ռուսական գազն անցնելու է Բալթիկ ծովի ընդերքով եւ հասցվելու է Գերմանիա: Ռուսական «Գազպրոմ» ընկերությունը, որը այդ նախագծի հիմնական բաժնետերն է, ավելի վաղ այդ ծրագիրն իրականացնելու համար հավանություն էր ստացել Ռուսաստանից, Շվեդիայից, Դանիայից եւ Գերմանիայից: Ֆինլանդիայի կառավարությունը թույլ է տվել գազատարը կառուցել Բալթիկ ծովի իր տնտեսական տարածքի սահմանում՝ դեռ անցյալ տարվա նոյեմբերին, բայց նախագծի իրագործման համար անհրաժեշտ էր եղել ստանալ նաեւ բնապահպանական գերատեսչության համաձայնությունը:
Բացի «Գազպրոմից», այս նախագծի բաժնետերեր են նաեւ գերմանական «BASF» եւ «E.ON», նաեւ հոլանդական «Gasunie» ընկերությունները:
