Երեկ ՀՀ կառավարության նիստի ժամանակ, ի թիվս այլ հարցերի, քննարկվել եւ հաստատվել է նաեւ բարձրագույն եւ հետբուհական մասնագիտական կրթության մասնագիտությունների հեռավար (դիստանցիոն) ուսուցման կարգը: Ինչպես տեղեկանում ենք ՀՀ կառավարության պաշտոնական լրահոսից՝ ՀՀ ԿԳ նախարարը պարտավորեցվել է եռամսյա ժամկետում կառավարության հաստատմանը ներկայացնել այն մասնագիտությունների ցանկը, որոնցով հեռավար բարձրագույն մասնագիտական կրթություն ստանալ չի թույլատրվում, քառամսյա ժամկետում հաստատել բարձրագույն եւ հետբուհական մասնագիտական կրթության մասնագիտությունների հեռավար ուսուցման կազմակերպման մեթոդական ուղեցույցը:
Այս առնչությամբ ՀՀ վարչապետ Տիգրան Սարգսյանը նշել է, որ հեռավար ուսուցման կարգը բազմակողմանի քննարկվել է շահագրգիռ կազմակերպությունների մասնակցությամբ: Կասկածից վեր է, որ այն կնպաստի կրթության նոր մշակույթի ձեւավորմանը, ուսուցման որակի բարձրացմանը: Վարչապետի համոզմամբ, նոր կարգի ընձեռած հնարավորությունից կարող են օգտվել նաեւ մասնավոր բուհերը, որոնք ավելի ճկուն են եւ նոր գաղափարների հանդեպ՝ ընկալունակ: Տիգրան Սարգսյանը վերահաստատել է մասնավոր բուհերի ռեկտորների հետ հանդիպման ժամանակ արած իր այն հավաստիացումը, թե ՀՀ կառավարությունը բուհերի համար ապահովում է մրցակցային հավասար պայմաններ:
Բացի այդ, երեկվա նիստում կառավարությունը իր նախկին որոշումներից մեկում կատարել է փոփոխություններ, որոնցով սահմանվել են «Մասնագիտական կրթության որակի ապահովման ազգային կենտրոն» հիմնադրամի խորհրդի ձեւավորման նոր սկզբունքներ: Որոշումը հնարավորություն կտա հիմնադրամի գործունեության համար ապահովել բավարար անկախություն եւ դրա աշխատանքի արդյունքների ճանաչում՝ եվրոպական կառույցների կողմից:
