«Լոռվա ձոր» հայրենակցական միությունը եւս իր միջոցառումների շարքը կունենա՝ նվիրված իր մեծանուն հայրենակցի՝ Հրանտ Մաթեւոսյանի ծննդյան 75-ամյակին: Մասնավորապես, մեր օժանդակությամբ կձգտենք իրականություն դարձնել «մաթեւոսյանական» մոտիվներով մոնոներկայացման բեմադրությունը: Այն, մեր համոզմամբ, պետք է լինի ներկայացում, որը կճամփորդի երկրով մեկ՝ ժողովրդին հասցնելով Հրանտ Մաթեւոսյանի արձակի ոսկե էջերը: Սկսելով Լոռուց՝ այդ ներկայացումը կցուցադրվի երկրի մեծ ու փոքր բնակավայրերում:
«Լոռվա ձորում» ընդունված կարգ է՝ ճանաչված եւ անվանի մարդկանց հիշատակը հավերժացնել աղբյուր-հուշարձաններով: Այս տարի մտադիր ենք մի այդպիսի հուշարձան կառուցել իրեն շատ հարազատ «Լոռվա ձորի» անկյուններից մեկում:
Ավանդական դարձող ճանաչված գեղանկարիչների ստեղծագործական այցելությունը Մոտկոր եւ Ահնիձոր նվիրված կլինի մաթեւոսյանական բնաշխարհին, նրա ստեղծագործությունների հերոսներին եւ նրանց հետնորդներին: Բնականաբար, այս ամենի արդյունքը կլինի «Մաթեւոսյանական աշխարհը» խորագիրը կրող գեղանկարչական աշխատանքների ցուցահանդեսը Երեւանում, Վանաձորում, Ալավերդիում: Մտադիր ենք կազմակերպել մաթեւոսյանական ընթերցումներ բուհերում, ինչպես նաեւ սահմանել անվանական կրթաթոշակ՝ մանկավարժական բուհերից մեկում: Միջոցառումները կեզրափակենք ուխտագնացությամբ՝ դեպի Հրանտ Մաթեւոսյանի ծննդավայր Ահնիձոր, ժողովրդական տոնախմբությամբ:
ՍԵՐԳՈ ԵՐԻՑՅԱՆ
«Լոռվա ձոր» հայրենակցական
միության նախագահ,
գիտությունների դոկտոր, պրոֆեսոր
