Ամերիկայի հայկական ասամբլեան եւ Հայ բարեգործական ընդհանուր միությունը մեղադրում են Հայ Հեղափոխական Դաշնակցություն կուսակցությանը` ԱՄՆ պետքարտուղար Քլինթոնի հետ հանդիպումը վիժեցնելու համար: Այդ մասին հաղորդում է haynews.am-ը՝ հղում անելով Միացյալ Նահանգներից ստացած տեղեկություններին: ԱՀԱ-ն եւ ՀԲԸՄ-ն կարծում են, որ Դաշնակցությունը վիժեցրել է հանդիպումը, որպեսզի Քլինթոնի մոտ հայ-թուրքական հարաբերությունների մասին գերակայի իր տեսակետը:
ՍԻԼՎԱ ԱՍԱՏՐՅԱՆԸ ՀԱՂԹԵՑ
Երեկ Մարդու իրավունքների եվրոպական դատարանը կայացրել է վճիռ՝ հօգուտ 9 տարվա ազատազրկման դատապարտված Հայաստանի քաղաքացի Սիլվա Ասատրյանի: Այն առնչվում էր Ասատրյանին ապօրինի ազատությունից զրկելուն: Ժամանակին ՀՀ վերաքննիչ դատարանը Ս. Ասատրյանի նկատմամբ կայացրել էր խափանման միջոցը փոխելու որոշում, սակայն այնուհետեւ ոչ աշխատանքային ժամին ընդունել էր դատախազության բողոքը Ասատրյանի վերաբերյալ, որից հետո կնոջը անհայտ մեքենայով դատարանի դահլիճից փախցրել էին: Որպես փոխհատուցում, Հայաստան պետությունը պետք է Ս. Ասատրյանին եռամսյա ժամկետում վճարի 2500 եվրո:
