Հայաստանի լրատվական գործակալություններն ու կայքերը, հղում անելով թուրքական աղբյուրներին, տեղեկացնում են, որ պոլսահայ հայտնի հասարակական գործիչ, «Ակոս» թերթի գլխավոր խմբագիր Հրանտ Դինքի սպանության գործով դատավարական զավեշտները շարունակվում են: Փետրվարի 8-ին սկսված հերթական 12-րդ դատալսումը եւս հետաձգվել է, քանի որ դատարան չի բերվել գործով գաղտնի վկան: Դատավորի հայտարարությամբ՝ ոստիկանությունը մոռացել էր դատական սրահ բերել գաղտնի վկային: Ավելին. ոստիկանները մոռացել էին ոչ միայն գաղտնի վկային, այլ նաեւ թարգմանչին: Արդեն քանի անգամ նման բացթողումների պատճառով հետաձգված դատական լսումների համար ոչ ոք պատասխանատվություն չի ստանձնում: Տվյալ պարագայում Ստամբուլի ոստիկանությունը հայտարարել է, որ իրենք վկային դատարան բերելու հրահանգ չեն ստացել: Գաղտնի վկայի ներկայության պայմաններում դատարանը լուրջ տեղաշարժ կգրանցեր, քանի որ վերջինս հայտարարել էր, որ դեպքի պահին եղել է այնտեղ եւ տեսել է, որ Հրանտ Դինքին սպանողը մենակ չի եղել, եւ այլ մանրամասներ: Նաեւ հայտնի է դարձել, որ գաղտնի վկան հայ է: Ստամբուլի ծանր հանցագործությունների գծով 14-րդ դատարանի նախագահ Էրքան Չանաքը խոստացել է, որ հաջորդ դատալսմանը անպայման ներկա կլինի թե գաղտնի վկան, թե թարգմանիչը:
