Այս ամսվա ընթացքում Վրաստանում հեռարձակվող կաբելային հեռուստաընկերություններից որոշները հնարավոր է՝ փակվեն: Դրանց թվում է նաեւ հայկական մի հեռուստաալիք: Ըստ Panorama.am-ի, այս մասին գրել է վրացական «Ռեզոնանսի» թերթը՝ չնշելով, սակայն, թե հատկապես հայկական որ հեռուստաալիքն է լինելու վրացական իշխանությունների թիրախում:
Ըստ «Ռեզոնանսի»-ի տվյալների, փակվելիք հայկական հեռուստաալիքի դեմ վրացական իշխանությունները որոշ դժգոհություններ ունեն, քանի որ այդ ալիքի ինֆորմացիոն քաղաքականությունը իրենց դուր չի գալիս:
Վրաստանի պաշտոնական կառույցները, ըստ թերթի, մտադիր են հեռարձակման լիազորությունից զրկել մի քանի ռուսական երաժշտական հեռուստաալիքների, քանի որ դրանցով Աբխազիան ու Հարավային Օսիան ներկայացվում են որպես Վրաստանից անկախ պետություններ: Մասնավորապես, առաջարկվել է չվերահեռարձակել «Euronews» հեռուստաալիքը, քանի որ դրա նորությունները պատրաստվում են Մոսկվայում:
