«Լեռնային Ղարաբաղի հակամարտության բանակցային կարգավորումը այլընտրանք չունի: Կարգավորումը ենթադրում է, որ կողմերը պետք է համաձայնեն փոխզիջումների գնալ եւ, ուրեմն, քաղաքական կամք դրսեւորեն: Այժմ բանակցային դժվար փուլում ենք, որը կախված է կողմերի կայացրած որոշումներից, կարտահայտվի կա՛մ առաջընթացով դեպի կարգավորում, կա՛մ նահանջով՝ բանակցային գործընթացում»,- report.am-իn տված հարցազրույցում ասել է Հայաստանում Ֆրանսիայի արտակարգ եւ լիազոր դեսպան Սերժ Սմեսովը: Պատասխանելով հայ-թուրքական արձանագրությունների մասին հարցին՝ ասել է. «Կարծում ենք, որ ամեն ինչ պետք է արվի Հայաստանի եւ Թուրքիայի միջեւ հարաբերությունների նորմալացման գործընթացը մինչեւ վերջ հասցնելու համար: Խոսքը երկու երկրների միջեւ պատմական տարաձայնությունները հաղթահարելու եզակի հնարավորության մասին է:
Ցավալի կլիներ, եթե ամեն ինչ չարվեր դրանից օգտվելու համար»: Իսկ Հայոց ցեղասպանության միջազգային ճանաչման հարցը, դեսպանի համոզմամբ, կապ չունի հայ-թուրքական արձանագրությունների գործընթացի հետ. «Ըստ իս, երկու հարցերն ինքնին կապված չեն: Իմ պատկերացմամբ, արձանագրությունների ստորագրումը չի ենթադրում հրաժարում ցեղասպանությունը միջազգայնորեն ճանաչելու՝ հայ ազգի օրինական պահանջատիրությունից: Այլ կերպ ասած, եթե հայկական իշխանությունները հրաժարվել են այն նախապայման դարձնելուց՝ մի բան, որն անհնարին կդարձներ արձանագրությունների բանակցումը, դա չի նշանակում, թե ցեղասպանության ճանաչման հայ ժողովրդի ձգտումն անտեսվել է»:
