![\"\"](\"https://www.aravot.am/2010/aravot_arm/February/10/p1.jpg\")
Անցած տարվա հոկտեմբերի 26-ին ԱԱԾ-ն կաշառք ստանալու փաստով ձերբակալել է
ՀՀ ոստիկանության Հասարակական կարգի ապահովման վարչության առանձին ոստիկանության վաշտի հրամանատար, մայոր Հարություն Հովհաննիսյանին (լուսանկարում՝ քաղաքացիական զգեստով): Հ. Հովհաննիսյանը իր ենթակա, նույն վարչության աշխատակից
Ա.-ից սպայական պաշտոնի նշանակելու դիմաց պահանջել եւ ստացել է 2 500 ԱՄՆ դոլար: Երեկ Կենտրոն եւ Նորք-Մարաշ համայնքների դատարանում սկսվեց Հարություն Հովհաննիսյանի գործի դատաքննությունը: Իբրեւ տուժող հանդես եկող Ա.-ն դիմել էր դատավոր Մնացական Մարտիրոսյանին, որպեսզի իր անվտանգությունից ելնելով՝ հարցը լսվի դռնփակ դատական նիստում: Մինչ նիստի սկսվելը՝ ոստիկանության ուղեկցող գունդը դատարան բերեց տարբեր գործերով մի քանի մեղադրյալների: Բոլորը կրում էին ձեռնաշղթաներ, սակայն կաշառակերության մեջ մեղադրվող Հարություն Հովհաննիսյանը առանց ձեռնաշղթաների էր, ինչը օրենքի խախտում է: Դեռ մի քանի տարի առաջ, երբ լրագրողները «Ա1+»-ի փակման հերթական տարելիցի օրը փորձում էին ծառատունկ իրականացնել Արամ Խաչատրյանի արձանի մոտ, Հարություն Հովհաննիսյանը իր անմիջական ղեկավարի՝ գնդապետ Չիբուխչյանի հետ ամեն կերպ խոչընդոտում էր լրագրողներին, իսկ տնկված ծառերը արմատախիլ արեցին: Ի դեպ, նախաքննական մարմնում Հովհաննիսյանը ցուցմունք է տվել, որ ինքը գումարը պահանջել եւ ստացել է Չիբուխչյանի ցուցումով, ինչի կապակցությամբ ՀՀ ոստիկանապետ Ալիկ Սարգսյանի հրամանով նշանակվել էր ծառայողական քննություն. արդյունքում Չիբուխչյանը ՀՀ ոստիկանապետի հրամանով հեռացվել է համակարգից:
