ՀՀ ոստիկանության կազմակերպված հանցավոր խմբերի կողմից կատարված հանցագործությունների 40,0%-ը (209-ը) կատարել են օտարերկրյա քաղաքացիներ: Նախորդ ուրբաթ ոստիկանության կոլեգիայի նիստի ընթացքում հաղորդեց ՀՀ ոստիկանության պետ Ալիկ Սարգսյանը: Նրա տեղեկացմամբ, օտարերկրյա քաղաքացիների կողմից Հայաստանում կատարված հանցագործությունների թիվն աճել է 5,7 անգամ (2008 թ.՝ 79, 2009 թ.՝ 452): Այս ամենն ինքնին վկայում է այն մասին, որ մեր երկիրն արդեն իսկ դարձել է միջազգային հանցավոր խմբավորումների հետաքրքրության առարկա: Այդ են վկայում վերջին ժամանակներում Հայաստանում վնասազերծված արտասահմանյան հանցավոր խմբերը: Միջազգային հանցավորության նման «էքսպանսիային» դիմակայելու համար անհրաժեշտ է միջազգային չափանիշներին հասցնել նաեւ ոստիկանության նյութատեխնիկական հագեցվածությունը, ինչպես նաեւ ծառայողների պրոֆեսիոնալ պատրաստականության մակարդակը: Ոստիկանությունում մշակվել է կրթական համակարգի բարեփոխումների հայեցակարգը:
