Մեր երկիրը սկսել է նախապատրաստական աշխատանքներ՝ հաշմանդամության գնահատման նոր, եվրոպական մոդելին անցնելու համար: Այս մասին տեղեկացրել է աշխատանքի եւ սոցիալական հարցերի նախարարության պատվիրակությունը՝ օրերս Նյու Յորքում տեղի ունեցած ՄԱԿ-ի Սոցիալական զարգացման հանձնաժողովի 48-րդ նստաշրջանում: Նիստը նվիրված է եղել սոցիալական ինտեգրման խնդրին, մասնավորապես՝ հաշմանդամների, երիտասարդության, ընտանիքի եւ ծերացման հարցերին: Արտաքին գործերի մամուլի ծառայությունից հայտնում են, որ Հայաստանի ներկայացուցիչն իր ելույթում անդրադարձել է 2008-2021թթ. համար կառավարության մշակած «Կայուն զարգացման ծրագրին», որի հիմնական մասն են կազմում աղքատության հաղթահարման եւ սոցիալական զարգացման խնդիրները:
