Ամերիկայի հայկական եւ հրեական համայնքների առաջնորդները ինտերնետային խնդրագրով դիմել են մարդկանց՝ ստորագրել նամակ, որն ուղղված է լինելու ԱՄՆ նախագահ Բարաք Օբամային ու Կոնգրեսին: Մասաչուսեթսի հայկական համայնքի տրամադրած տեղեկատվության համաձայն, նամակով կոչ է արվում ԱՄՆ նախագահին եւ Կոնգրեսին՝ ճանաչել Հայոց ցեղասպանության ճանաչման վերաբերյալ 252-րդ բանաձեւը:
«Այս նախաձեռնությունը կարեւոր է, քանզի դա ցույց է տալիս, որ երկու համայնքներն էլ՝ հայկական եւ հրեական, արդարության վերականգնման խիստ պահանջ ունեն: Սա կենսական նշանակություն ունեցող ակցիա է, ինչը կստիպի Վաշինգտոնի ազդեցիկ ուժերին, լինեն դրանք Պետդեպարտամենտում, թե լոբբիստական գործունեությամբ զբաղվող կազմակերպություններում` հասկանալ եւ գիտակցել, որ իրենք պատասխան կտան, եթե պատմական ճշմարտությունը զոհաբերեն քաղաքական նպատակահարմարությանը»,- ասել է Մասաչուսեթսի Հայ դատի գրասենյակի ներկայացուցիչ եւ ակցիայի համանախագահ Լաուրա Պողոսյանը:
