![\"\"](\"https://www.aravot.am/2010/aravot_arm/February/4/p19.jpg\")
Կալիֆոռնիայի համալսարանի աշխատակիցներն առաջին անգամ Լոս Անջելես քաղաքում գլխուղեղի չարորակ ուռուցքի՝ գլիոբլաստոմայի բջիջների ամբողջական գենոմային հետազոտություն են անցկացրել: Հետազոտության արդյունքում գիտնականներին հաջողվեց ստեղծել տարատեսակ մուտացիաների մի պատկեր, որոնք խթան են հանդիսանում չարորակ նորագոյացության զարգացման եւ գլխուղեղի հյուսվածքներում տարածման համար: Հետազոտական նախագծի համակարգող Ստեն Նելսոնի խոսքերով, հետազոտության մեջ բարձրակարգ եւ ցածրակարգ մեթոդների ներդրման շնորհիվ, գլխուղեղի չարորակ ուռուցքի գենոմի ապակոդավորման ծախսերը ընդամենը $35000 են կազմել: Համեմատության համար նշենք, որ մի քանի տարի առաջ մարդկային գենոմի ամբողջական ապակոդավորման ֆինանսավորումը գերազանցել էր միլիարդ դոլարը: Հետազոտության մեջ օգտագործվել են U87 գլիոբլաստոմայի բջիջները, որոնց նմուշները բազմիցս հետազոտվել էին աշխարհի առաջատար լաբորատորիաներում:
Այս նոր հետազոտության հեղինակներին հաջողվել է կազմել մուտացիաների եւ քրոմոսոմային անոմալիաների ամբողջական պատկեր, որը գլիոբլաստոմայի բջիջները տարբերում է առողջ բջիջներից: Գլիոբլաստոմայի գենոմի բջիջների ապակոդավորումը գիտնականներին թույլ կտա հստակեցնել այս հիվանդության առաջացման պատճառները եւ նոր մեթոդներ մշակել, որպեսզի դեղորայքն ավելի արդյունավետ ազդեցություն ունենա ուռուցքի վրա:
Բացի դրանից, ուռուցքային բջիջների գենետիկ առանձնահատկությունների իմացությունը նոր հնարավորություններ է տալիս մշակել գենետիկ ախտորոշման բարձր զգայունություն ունեցող մեթոդներ, որոնք թույլ կտան կիրառել բուժման ավելի արդյունավետ եղանակներ, գնահատել կատարված բուժման արդյունքը, ինչպես նաեւ հնարավորինս կանխել հիվանդության հնարավոր բարդությունները: Գլիոբլաստոման գլխուղեղի առավել հաճախ հանդիպող չարորակ ուռուցք է, որը դժվարությամբ է ենթարկվում ինչպես վիրաբուժական, այնպես էլ ճառագայթային բուժման: Ներկայումս կիրառվող բուժման մեթոդներն ի վիճակի չեն զգալիորեն ավելացնել հիվանդների կյանքի տեւողությունը: Հիվանդների մեծամասնությունը մահանում է հիվանդության հայտնաբերումից մի քանի ամիս անց:
