Ֆրանսիայի իշխանությունները հրաժարվել է քաղաքացիություն տալ մի օտարերկրացու՝ դա հիմնավորելով նրանով, որ վերջինս ստիպում է իր կնոջը փարաջա կրել եւ ամբողջովին ծածկել դեմքն ու մարմինը: Թե ո՞ր երկրից է եղել այդ օտարերկրացին, ըստ BBC-ի, չի հաղորդվում: Հայտնի է միայն, որ նրա կինը ֆրանսուհի է, եւ Ֆրանսիայի քաղաքացիությունը օտարերկրացուն անհրաժեշտ է եղել կնոջ հետ ամուսնանալու եւ նրա հետ Ֆրանսիայում բնակություն հաստատելու համար:
Ներգաղթի հարցերով ֆրանսիացի նախարար Էրիկ Բեսսոնը մերժումը բացատրել է նրանով, որ օտարերկրացին զրկել է կնոջը ազատ եւ բաց դեմքով տեղաշարժի իրավունքից: Նախարարը նաեւ շեշտել է, որ ֆրանսիական օրենսդրության համաձայն, Ֆրանսիայի քաղաքացիություն ստանալու հավակնություն ունեցող յուրաքանչյուր մարդ պետք է ցուցաբերի այդ երկրում «ինտեգրվելու ձգտում»:
Հիշեցնենք, որ հունվարի վերջին ֆրանսիացի օրենսդիրները առաջարկել էին հասարակական մի շարք վայրերում արգելել դեմքը ծածկող մուսուլմանական ավանդական հագուստ կրելը:
