![\"\"](\"https://www.aravot.am/2010/aravot_arm/February/3/p10.jpg\")
Հռոմի պապ Բենեդիկտոս 16-րդը Բրիտանիայի կաթոլիկ եկեղեցականներին կոչ է արել հանդես գալ իրավահավասարության մասին օրինագծի դեմ, որը կարող է ստիպել եկեղեցուն՝ հրաժարվել բարձր պաշտոններում համասեռամոլների նշանակման վրա դրված արգելքից: BBC-ի մատուցմամբ, Բենեդիկտոս 16-րդը այդ մասին հայտարարել է Անգլիայի եւ Ուելսի կաթոլիկ հոգեւորականների հետ Հռոմում տեղի ունեցած հանդիպման ժամանակ: Նա նաեւ հաստատել է, որ մտադիր է ընթացիկ տարում այցելել Բրիտանիա: Դա կլինի 1982թ.-ից ի վեր Վատիկանի առաջնորդի համանման առաջին այցը:
Հիշեցնենք, որ Բրիտանիայի խորհրդարանում քննարկման առարկա դարձած օրինագծի համաձայն, երկրի տարածքում գործող կրոնական կազմակերպությունները պարտավորված են լինելու աշխատանքի ընդունել ինչպես համասեռամոլների, այնպես էլ տրանսսեքսուալների: Այդ կարգը, ի դեպ, չի տարածվելու միայն այն պաշտոնների վրա, որոնք հոգեւոր դաս են համարվում:
«Հռոմի պապը խոսում է մեր երկրի կողմից հասարակության բոլոր անդամների հավասարության հարցում ցուցաբերած հավատարմության մասին: Մենք կարծում ենք, որ կյանքում բոլորը պետք է հավասար հնարավորություններ ստանան, եւ ոչ ոք չի կարող խտրական վերաբերմունքի ենթարկվել: Հավասարության մասին օրենքը Բրիտանիան կդարձնի ավելի հավասար երկիր»,- հայտարարել է խտրականությանը դիմակայելու հարցերով զբաղվող կառավարական գերատեսչության պաշտոնական ներկայացուցիչը:
