«Առավոտը» բազմիցս է գրել Տավուշի մարզի սահմանամերձ գյուղերում կատարված եւ այդպես էլ չբացահայտված խոշոր եղջերավոր անասունների գողությունների մասին: Վերջին մեկուկես ամսում այստեղ անասնագողություն չէր եղել: Ոստիկանության զինված խմբերը գիշերը պարեկում էին սահմանամերձ գյուղերում: Սակայն դա առայժմ արդյունք չի տալիս: Փետրվարի լույս 2-ի գիշերը սահմանամերձ Կոթիում առեւանգել են Գագիկ Գյանջալյանի 2 կովը: Կոթիի գյուղապետարանից տեղեկացանք, որ անասնագողության հետքերը դեպի Ադրբեջանի սահմանագիծ են տանում: Կոթեցիներն ասում են, որ անասնապահությամբ զբաղվելու համար Գագիկ Գյանջալյանը բանկից վարկ էր վերցրել, հիմա ինչպե՞ս պիտի մարի այն: Երկու ամիս առաջ Կոթիում գողացել էին ուսուցիչ Հայկազ Բայրամյանի 2 կովը եւ 2 երինջը: Չբացահայտված տասնյակ անասնագողությունները սահմանամերձ գյուղերում սարսափի եւ հուսահատության տրամադրություններ են ստեղծում, նպաստում այս տարածքից բնակիչների արտագաղթին:
