«Իմ միջոցով՝ ազգիս համար». այս կարգախոսով երեկվանից սկիզբ դրվեց «Հայոց արծիվներ» հայրենասիրական հասարակական կազմակերպությանը: ՀՀ սպորտի եւ երիտասարդության հարցերի փոխնախարար, Սյունիքի մարզում գործող «Սյունյաց արծիվներ» երիտասարդական հ/կ-ի նախագահ Խաչիկ Ասրյանի նախաձեռնությամբ՝ Ազգային բանակի օրվա նախօրեին հիմնադրվեց եւ պետական գրանցում ստացավ «Հայոց արծիվներ» հ/կ-ն: «Առավոտի» հետ զրույցում Խ. Ասրյանն ասաց, որ Հայաստանի եւ ԼՂՀ ողջ տարածքում խիստ անհրաժեշտ է ռազմահայրենասիրական դաստիարակությունը, բանակ-հասարակություն կապի ամրապնդումը. «Այն, ինչ 7 տարիների ընթացքում արել է «Սյունյաց արծիվները», այսուհետեւ դրա ավելի լայնածավալ գործունեությունը կիրականացնի «Հայոց արծիվները»: Մասնակից ենք լինելու ՀՀ նախագահի օրհնաբեր գործունեությանը»: Կազմակերպության հիմնադիրը նշեց նաեւ, որ «Հայոց արծիվները» 2010-ը հայտարարել է ռազմահայրենասիրության տարի: ՀՀ պաշտպանության նախարար Սեյրան Օհանյանը մյուս բանախոսների նման կարեւորեց «Հայոց արծիվների» ստեղծումը: Խ. Ասրյանի փոխանցմամբ, Սյունիքում գործող «Սյունյաց արծիվներ» երիտասարդական կազմակերպությունը այսուհետեւ գործելու է որպես «Հայոց արծիվների» մարզային մասնաճյուղ:
