ՀՅԴ մասին ասում է ԵԽԽՎ-ում ՀՀ պատվիրակությունում «Ժառանգության» ներկայացուցիչ Զարուհի Փոստանջյանը
ԵԽԽՎ Մոնիտորինգի հանձնաժողովը երեկ առավոտյան եւս մի անգամ անդրադարձավ Հայաստանի հարցին: Ինչպես մեզ Ստրասբուրգից փոխանցեց Զարուհի Փոստանջյանը՝ քննարկումը տեւել է շուրջ 10 րոպե, ելույթ են ունեցել ինքը եւ ԵԽԽՎ-ում Հայաստանի պատվիրակությունում ՀՅԴ ներկայացուցիչ Արմեն Ռուստամյանը: Զարուհի Փոստանջյանը մասնավորապես անդրադարձել է մարտի 1-ին եւ դրան հաջորդած զարգացումներին:
«Ժառանգության» ներկայացուցչին հարցեր են տվել Հայաստանի խորհրդարանում ուժերի հարաբերակցության եւ կուսակցությունների ունեցած տոկոսների մասին: Զարուհի Փոստանջյանն ի պատասխան մասնավորապես հիմնավորել է, թե ինչու ՀՅԴ ներկայացուցիչը չի կարող ԵԽԽՎ-ում ներկայացնել ընդդիմության կարծիքը. «Այդ կուսակցությունը, որը ներկայումս ընդդիմության մեջ է՝ եղել է իշխանության մեջ: Եվ նաեւ իրենք ունեն մեղքի բաժին այն խախտումների եւ հանցագործությունների համար, որ անցած 10 տարիների ընթացքում եղել է Հայաստանի Հանրապետությունում»: Նաեւ զուգահեռ է տարել, թե նույն կերպ «Բարգավաճ Հայաստանին» էլ կարելի է դարձնել ընդդիմություն. «Եվ նրանք կասեն, թե իրե՛նք են ամենամեծ ընդդիմադիր խմբակցությունը»: Զարուհի Փոստանջյանը պնդել է, որ Հայաստանի ընդդիմությունը ԵԽԽՎ Մոնիտորինգի հանձնաժողովում պետք է ներկայացված լինի հենց «Ժառանգության» միջոցով. «Մեր կուսակցությունը երբեւէ իշխանության մաս չի եղել՝ միշտ եղել է ընդդիմություն: Մենք որեւէ կաշկանդվածություն չունենք քննադատելու այս իշխանություններին, քանի որ մեղսակից չենք եղել եւ չենք կիսում ժողովրդի դեմ 10 տարի իրականացված քաղաքականության պատասխանատվությունը»:
«Ժառանգության» ներկայացուցչի այս մեղադրանքներից հետո է ելույթի ցանկություն հայտնել Արմեն Ռուստամյանը, որին, ըստ տիկին Փոստանջյանի՝ հատկացրել են 1 րոպե ժամանակ. «Եվ այդ 1 րոպեի ընթացքում նա ասում էր, թե ի՞նչ կա որ՝ մենք կարող ենք փոխել մեր կարծիքը եւ դառնալ ընդդիմություն: Իսկ քանի որ ՀՅԴ խմբակցությունը մեծաքանակ է՝ ըստ նրա, իրենք պետք է ներգրավված լինեն հիմնական կազմում, սակայն պատրաստ են մեզ հետ համագործակցել»:
Հիշեցնենք, որ Արմեն Ռուստամյանը նախօրեին «Առավոտին» հիշեցրել էր, որ ՀՅԴ-ն չի ստորագրել 2008-ի նախագահական ընտրությունների վերաբերյալ ԿԸՀ արձանագրությունը, նաեւ, որ իրենց խմբակցությունը հատուկ կարծիք է ունեցել «Մարտի 1»-ի ժամանակավոր հանձնաժողովի եզրակացության վերաբերյալ. «Ընդդիմությունը միայն մարտի 1-2-ի հարցերով չէ, որ այստեղ ներկայացնում է Հայաստանը: Հազարավոր հարցեր կան, որոնք կապված են ընդդիմության հետ, եւ եթե ավելի լավ ներկայացնելու խնդիր դրվի՝ շա՜տ մեծ հարցական է, թե ով է ավելի լավ ներկայացնում ընդդիմադիր դաշտի ամբողջական պատկերը»:
Արձագանքելով նրա այս հաստատումներին՝ Զարուհի Փոստանջյանն ասաց. «Նախ՝ հիշեցնեմ, որ ՀՅԴ-ն ստորագրել է ե՛ւ Սամվել Նիկոյանի զեկույցի տակ, ե՛ւ ԿԸՀ արձանագրությունը: Իսկ նրանց ներկայացրած լղոզված վերապահումներին որեւէ անդրադարձ չի կարող լինել, քանի որ եթե ՀՅԴ-ն ստորագրել է՝ արդեն վկայում է, որ նրանք համաձայն են այդ եզրակացությանը»:
«Ժառանգության» ներկայացուցիչը նաեւ հիշեցրեց, որ ՀՅԴ-ն երբեւէ չի հայտարարել, թե «մենք այսօր ունենք քաղաքական հայացքների համար ազատազրկված անձինք: Նրանց խմբակցության ներկայացուցիչները նույնիսկ ելույթներ չունեցան՝ չառարկեցին, երբ 2008-ի մարտի 4-ին ԱԺ պատգամավորներին զրկում էին անձեռնմխելիությունից: Կարող եմ ասել, որ ո՛չ միայն անցած 10 տարիների ընթացքում են իրենք մասնակցել հանցագործությունների կատարմանը, այլեւ դրանից հետո է՛լ են մասնակցում: Եվ իհարկե՝ իրենք իրենց երբեւիցե չեն կարող մեղադրել այդ հանցագործությունների մեջ: Ի՞նչ եք կարծում՝ հանցագործություն կատարած անձն իրավունք ունի՞ ներկայացնելու իրավունքներն ու կարծիքը այն անձի, որի նկատմամբ կատարել է հանցագործություն: Հնարավո՛ր չէ: Բայց այս պահին դա է տեղի ունենում: Եվ մարտի 1-ը միայն այդ օրը չէ՝ դա վերջին հատկապես 10 տարիներին իրականացված կեղծիքների եւ գործընթացների հետեւանքն է: Չեմ ասում, թե մինչ այդ ոչինչ չի եղել՝ 1995-ից սկսած մեզ մոտ ամեն ինչ գնացել է շատ սխալ ուղղությամբ: Եվ սխալվում են մարդիկ, որոնք կարծում են, թե կարելի է մեկ օրում իրենց հռչակել իբրեւ ընդդիմություն եւ այդպես էլ ընկալվել: Ես երբե՛ք չեմ կարող վստահել պրն Ռուստամյանին ընդդիմության, իմ կուսակցության եւ այն ժողովրդի կարծիքը, որն ինձ պատվիրակել է այստեղ: Թեեւ իրոք կցանկանայի, որ իրականում ընդդիմադիր լիներ պրն Ռուստամյանը ու ներկայացներ ընդդիմության կարծիքը»:
Միջանկյալ հիշեցնենք, որ «Ժառանգությունը» եւ ՀՅԴ-ն միասնաբար են հանդես գալիս հայ-թուրքական արձանագրությունների դեմ: «Իրե՛նք են պաշտոնապես հայտարարել, որ իրենց անհամաձայնությունը միայն արտաքին քաղաքական հարցերի վերաբերյալ է՝ ո՛չ ներքին քաղաքականության,- նկատեց Զարուհի Փոստանջյանը:- Բայց այս առումով էլ ունեմ իմ կարծիքը, որ նույնիսկ արտաքին քաղաքական հարցերի առումով նրանք Հայաստանի իշխանությանը համակարծիք են, քանի որ հայ-թուրքական արձանագրությունների դեմ իրենց բոլոր միջոցառումները որեւէ կերպ չխոչընդոտվեցին: Մինչդեռ մեր կազմակերպած միջոցառումները միշտ դառնում էին ե՛ւ հարձակումների, ե՛ւ խոչընդոտների, ե՛ւ բռնությունների թիրախ»:
Որպես եւս մի փաստարկ, թե ՀՅԴ ներկայացուցիչը ԵԽԽՎ-ում չի անդրադառնում ոչ միայն մարտի 1-ին առնչվող զարգացումներին՝ տիկին Փոստանջյանն ասաց. «Եթե պրն Ռուստամյանն իրոք ավելի լավ է ներկայացնում ընդդիմադիր դաշտի ամբողջական պատկերը եւ ոչ թե փորձում է սվաղել, լղոզել մեր երկրում առկա իրականությունը՝ կապված մարդու իրավունքների եւ արդար դատաքննության հետ, ես շատ կցանկանայի, որ երբ ԵԽԽՎ-ում հունվարի 27-ին քննարկվում էր ԶԼՄ-ների ազատության վերաբերյալ զեկույցը՝ նաեւ ինքը ելույթ ունենար եւ ասեր, որ խայտառա՛կ մի դատավճիռ կայացվեց Նիկոլ Փաշինյանի նկատմամբ: (Հիշեցնենք, որ Մեծ Բրիտանիայի պատվիրակ Մայքլ Հենքոքն այդ քննարկման ընթացքում արձագանքելով Նաիրա Զոհրաբյանի ելույթին՝ ասաց. «Մեր հայ գործընկերն ընդունեց որոշ սխալների առկայությունը, բայց անգամ չհիշատակեց այն փաստը, որ Հայաստանի առաջատար թերթի խմբագիրը հենց նոր դատապարտվել է 7 տարվա ազատազրկման».- Ա. Ի.): Ես շատ կցանկանայի, որ իրականում ինձ օգնող լիներ՝ բարձրաձայնելու այս բոլոր խնդիրների մասին: Ես շատ կցանկանայի, որ այդ խնդիրներն առաջադրեր նաեւ Արմեն Ռուստամյանը: Բայց իրականում դա տեղի չի ունեցել»:
Նշենք, որ երեկ այդպես էլ որոշում չի կայացվել, թե ով է ներկայացնելու Հայաստանի ընդդիմությունը ԵԽԽՎ մոնիտորինգի հանձնաժողովում: Այսօր տեղի է ունենալու ԵԽԽՎ բյուրոյի նիստը, որտեղ, ըստ Զարուհի Փոստանջյանի՝ պետք է քննարկվի նաեւ այդ հարցը. «Իսկ եթե այսօր դա չլինի՝ այդ որոշումը կկայացվի միգուցե այն բանից հետո, երբ Պրեսկոտն ու Կոլոմբիեն կգան Հայաստան»:
