Իրաքյան բժիշկներին կթույլատրվի զենք կրել. այսպիսի օրենսդրություն մշակվել է իրաքյան կառավարության կողմից՝ բժշկական անձնակազմի անվտանգությունն ապահովելու համար: Օրենսդրության ստեղծման համար առիթ են հանդիսացել բժիշկների բազմաթիվ բողոքները՝ կապված հիվանդանոցներում մահացող հիվանդների ազգականների հակաօրինական գործողությունների հետ: Երկրի որոշ շրջաններում գոյություն ունի սովորույթ, ըստ որի՝ մահացող հիվանդների ազգականները դրամական փոխհատուցում են պահանջում բուժող բժշկից: Իրաքի կառավարության կողմից մշակված օրենսդրական նախագիծը սահմանում է պատասխանատվության չափ այն անձանց համար, որոնք իրականացրել են այդ հակաիրավական արարքը: Մասնավորապես, նրանց սպառնում է 3 տարվա ազատազրկում կամ տուգանք 10 մլն իրաքյան դինարի չափով (մոտ 8 հազար ԱՄՆ դոլար):
Ինչպես նաեւ նախագիծը թույլատրում է բժիշկներին անհրաժեշտության դեպքում աշխատել եւս 7 տարի՝ թոշակառության տարիքը անցնելուց հետո (63 տարեկան): Փաստաթուղթը նաեւ հնարավորություն է ընձեռում բժշկական հաստատություններին՝ կառուցել բնակարաններ իրենց աշխատակիցների համար՝ անմիջապես աշխատավայրի հարեւանությամբ: Օրենսդրությունը, որն ուղղված է նվազեցնելու մասնագետների արտահոսքը արտերկիր, ինչպես նաեւ խթանելու նրանց վերադարձը, կքննարկվի իրաքյան կառավարության կողմից:
