ՀՀ Սփյուռքի նախարարությունը եւ Համաշխարհային հայկական կոնգրեսը հայտարարել են Սփյուռքի լրատվամիջոցների ամենամյա՝ «Հայապահպանության գործում ունեցած նշանակալի ավանդի համար» խորագրով մրցույթի մեկնարկի մասին: Սահմանված է չորս անվանակարգ. Հարություն քահանա Շմավոնյանի անվան մրցանակ՝ լավագույն տպագիր լրատվամիջոցին, Հովհաննես Ադամյանի անվան մրցանակ՝ լավագույն հեռուստաալիքին, Հակոբ Մեղապարտի անվան մրցանակ՝ լավագույն ռադիոեթերին, Հրանտ Դինքի անվան մրցանակ՝ լավագույն ինտերնետային լրատվամիջոցին: Աշխատանքների ներկայացման վերջնաժամկետը 2010 թվականի մարտի 30-ն է: Այս առթիվ լրագրողների հետ երեկվա հանդիպման ժամանակ Սփյուռքի նախարարության աշխատակազմի ղեկավար Ֆիրդուս Զաքարյանն ասել է. «Մեր պետության՝ Սփյուռքի նկատմամբ քաղաքականության հիմքում անկյունաքարային դեր ունի հայապահպանության խնդիրը: Այս տարի մրցանակաբաշխություն կհայտարարվի երկու ոլորտում՝ լավագույն լրատվամիջոցներ եւ Սփյուռքի լավագույն կրթական օջախ՝ ամենօրյա դպրոցներ եւ մեկօրյա կամ կիրակնօրյա դպրոցներ: Մրցույթին կմասնակցեն Սփյուռքի այն կրթական օջախները, որոնք առնվազն 5 տարի գործում են, եւ որոնց ուսման ծրագրերում ներառված կլինեն ինչպես հայոց լեզուն՝ արեւմտահայերենը կամ արեւելահայերենը, այնպես էլ հայոց պատմությունը»: Մրցանակային ֆոնդը կազմում է մոտ 30 000 ԱՄՆ դոլար:
