Կիեւում, «Ուկրաինա» տպագրատանը, որտեղ տպագրվում են երկրի նախագահական ընտրությունների երկրորդ փուլի համար նախատեսված քվեաթերթիկները, երեկ տեղի է ունեցել ձեռնարկության ղեկավարության «ուժային փոփոխություն»: Այս մասին, ըստ «News.am»-ի, հայտարարել է երկրորդ փուլ անցած Վիկտոր Յանուկովիչի մամուլի կենտրոնի ղեկավար Դմիտրի Պոնոմարչուկը: Նրա վկայությամբ, հատուկ ջոկատայինների եւ քաղաքացիական հագուստով մարդկանց հետ բախման արդյունքում տուժել են Յանուկովիչի ղեկավարած Տարածաշրջանների կուսակցության խորհրդարանական խմբակցության մի քանի պատգամավորներ:
Գրոհը ձեռնարկության վրա սկսվել է հունվարի 25-ի առավոտյան: Սկզբում ընկերության մոտ հայտնվել են քաղաքացիական հագուստով մարդիկ, որոնք սկսել են հարվածել դարպասներին: Տպագրատան պահակազորը փորձել է նրանց կանգնեցնել, սակայն վերջիններիս օգնության են եկել «Բերկուտի» հատուկ ջոկատայինները: Նրանք ջարդել են դուռը եւ ներխուժել շենք: Ջոկատայինները օգտագործել են մահակներ ու արցունքաբեր գազ: Շենքում գտնվող Տարածաշրջանների կուսակցության մի քանի պատգամավորներ փորձել են կասեցնել հարձակվողներին, սակայն ծեծի են ենթարկվել: Յանուկովիչի կողմնակից պատգամավորները բարիկադավորվել են 4-րդ հարկում, տպագրատան տնօրենի սենյակում: Նրանց հաջողվել է տեղի ունեցածի մասին ֆաքսով հաղորդագրություն տալ գլխավոր դատախազությանը:
Նախագահի թեկնածու Վիկտոր Յանուկովիչի շտաբը հայտարարել է արտակարգ ասուլիս հրավիրելու մասին: Հատկանշական է այն, թե ինչ գործ են ունեցել նախագահի թեկնածուներից մեկի՝ Յանուկովիչի խմբակցության պատգամավորները այն տպագրատանը, որտեղ տպագրվում են նախագահական ընտրությունների քվեաթերթիկները:
