Ավան եւ Նոր Նորք վարչական շրջանների դատարանում անցյալ ուրբաթ սկսվեց լրտեսության ձեւով պետական դավաճանության գործով դատավարությունը:
Անդրանիկ դատական նիստին, որպես մեղադրող, մասնակցել է ՀՀ գլխավոր դատախազ Ա. Հովսեփյանը: Մեղադրանքը նրա հետ կպաշտպանի նաեւ դատախազ Արամ Ամիրզադյանը:
Նախաքննությամբ ձեռք բերված ապացույցներին եւ կասկածյալ Գ. Հայրապետյանի նամակին անդրադարձել է «Առավոտը»: Հիշեցնենք, որ ՀՀ քաղաքացի, ՊՆ նախկին աշխատակից Գ. Հայրապետյանը եւ ԻԻՀ քաղաքացի, ազգությամբ ազերի Բ. Բաղերին մեղադրվում են պետական դավաճանության, ապօրինի կերպով հրազեն եւ ռազմամթերք ձեռք բերելու, պահելու եւ լրտեսության հոդվածներով, որը կատարվել է օտարերկրյա քաղաքացու կողմից:
Նախաքննության տվյալների համաձայն՝ ՀՀ ՊՆ նախկին աշխատակից Գ. Հայրապետյանը 2009 թ. ապրիլին անգամ հավաքագրվել է ադրբեջանական հատուկ ծառայությունների կողմից եւ, ստացած առաջադրանքի հիման վրա, հավաքել եւ նրանց փոխանցել գաղտնի տեղեկություններ ՀՀ զինված ուժերի մարտունակության եւ պաշտպանունակության վերաբերյալ, ինչպես նաեւ որոշակի նյութեր՝ հակահայկական քարոզչություն իրականացնելու նպատակով:
ԻԻՀ քաղաքացին ապահովված է թարգմանչով:
Ամբաստանյալ Գ. Հայրապետյանն իրեն լիովին մեղավոր ճանաչեց ապօրինի կերպով հրազեն եւ ռազմամթերք ձեռք բերելու ու պահելու համար, իսկ լրտեսության ձեւով պետական դավաճանության համար՝ մասնակի: ԻԻՀ քաղաքացի Բ. Բաղերին իրեն մեղավոր չճանաչեց:
Մեղադրողները միջնորդեցին դատաքննությունն անցկացնել դռնփակ՝ նկատի ունենալով, որ քրեական գործում կցված ապացույցներն իրենց մեջ պարունակում են պետական գաղտնիք, ինչին պաշտպանական կողմը չառարկեց: Դատարանը բավարարեց միջնորդությունը:
