Շեշտում է արդարադատության նախարար Գեւորգ Դանիելյանը
![\"\"](\"https://www.aravot.am/2010/aravot_arm/January/23/p2.jpg\")
«Սահմանադրական դատարանի յուրաքանչյուր որոշում ամբողջական փաստաթուղթ է, ինչից բխում է, որ դրանում ամրագրված դրույթները հավասարազոր իրավական արժեք ունեն, անկախ այն հանգամանքից, թե դրա որ հատվածում են զետեղված»,- «Ա1+»-ի հարցին, թե ՍԴ որոշման պրիամբուլան, մեկնաբանությունները ե՞ւս պարտադիր են խորհրդարանի համար, պատասխանել է ՀՀ արդարադատության նախարար Գեւորգ Դանիելյանը: «Այլ կերպ ասած, ՍԴ որոշմամբ ամրագրված բոլոր դրույթները համապարտադիր են»,- ասաց նախարարը:
«Սահմանադրական դատարանի մասին» ՀՀ օրենքի 61-րդ հոդվածի 5-րդ մասի համաձայն՝ «Սահմանադրական դատարանի գործով ըստ էության ընդունված որոշումները պարտադիր են բոլոր պետական եւ տեղական ինքնակառավարման մարմինների, դրանց պաշտոնատար անձանց, ինչպես նաեւ ֆիզիկական եւ իրավաբանական անձանց համար՝ ՀՀ ամբողջ տարածքում»:
«Ինչ վերաբերում է ՀՀ ԱԺ կողմից արձանագրությունները՝ ՍԴ-ի որոշմամբ ամրագրված մեկնաբանություններով վավերացնելու իրավական հնարավորությանը, ապա օրենսդիր մարմինը, որոշման հիման վրա վավերացնելով միջազգային պայմանագրերը, արդեն իսկ ամբողջությամբ ընդունում է այդ իրավական ակտը, քանզի այն մեկ ամբողջական իրավունքի աղբյուր է: Ոչ ոք չի կարող ՍԴ-ի որոշումն ընդունել մասնակի կամ դրան հակասող վերապահումներով»,- ասաց Գեւորգ Դանիելյանը:
Արդարադատության նախարարը նաեւ հավելեց, որ նշված 61-րդ հոդվածի 4-րդ մասի համաձայն. «ՍԴ-ի որոշումները եւ եզրակացությունները վերջնական են եւ ուժի մեջ են մտնում հրապարակման պահից, ինչից բխում է, որ դրանք չեն կարող վերանայվել որեւէ միջնորդության արդյունքում»: Այդ առիթով «Ա1+»-ը հիշեցնում է, որ թուրքական կողմը պահանջում է վերանայել ՍԴ որոշումը:
Հակառակ նախարարի վերոհիշյալ մեկնաբանության, հունվարի 20-ին ԱԺ մեծամասնության՝ ՀՀԿ խմբակցության ղեկավար Գալուստ Սահակյանը լրագրողների հետ հանդիպման ժամանակ ասել էր, որ ՍԴ որոշումը՝ հայ-թուրքական արձանագրությունների մասին, միայն այն է, որ դրանք համապատասխանում են Սահմանադրությանը, այլ ոլորտներ, ըստ Սահակյանի, չեն կարող պարտադրաբար լինել ՀՀ ԱԺ-ի համար:
