Սաուդյան Արաբիայում 13-ամյա մի դպրոցական աղջիկ դատապարտվել է մտրակի 90 հարվածի եւ երկամսյա բանտարկության՝ այն բանից հետո, երբ դպրոցի տնօրենը նրան «բռնացրել» է տեսախցիկ ունեցող բջջային հեռախոս ունենալու մեջ: Այս երկրի դպրոցներում արգելված է բջջայիններ ունենալ: Բացի այդ, դպրոցականին մեղադրել են նաեւ ուսուցչուհու հետ կոպիտ վարվելու մեջ: Բրիտանական «The Daily Mail» թերթը փոխանցում է, որ մարմնական վնասվածքներ հասցնող պատիժներ Սաուդյան Արաբիայում կիրառվում են նաեւ դեռահասների նկատմամբ, ինչը բազմիցս է դատապարտվել իրավապաշտպան կազմակերպությունների կողմից: Այսպես, երեք տարի առաջ 12-18 տարեկան 16 դպրոցականներ ուսուցչի նկատմամբ ագրեսիվ պահվածքի համար ենթարկվել էին ավելի դաժան պատժի՝ ստանալով մտրակի 500-600 հարված:
