Հունվարի 13-ին եւ 15-ին «Առավոտը» տեղեկացրել է, որ Հայաստանի մարզերում՝ մասնավորապես եւ ողջ հանրապետությունում՝ ընդհանրապես, 2009 թվականին արձանագրվել է ծնունդների աճ:
Իսկ ըստ «Մեդիամաքս» գործակալության, Լեռնային Ղարաբաղի Հանրապետությունում էլ են անցած տարի աճել ամուսնությունների թիվը եւ ծնելիության ցուցանիշը: Այս մասին հայտարարել է ԼՂՀ սոցիալական ապահովության նախարար Նարինե Ասծատրյանը: Ամուսնությունների խթանման նոր ծրագրի շնորհիվ 2009 թվականին ԼՂՀ-ում գրանցվել է 947 նոր ընտանիք, ինչը զգալիորեն գերազանցում է պետության անկախության տարիների միջին տարեկան ցուցանիշը: Նախնական տվյալներով, նախորդ տարի ԼՂՀ-ում ծնվել է 2821 երեխա, ինչը 16.7%-ով գերազանցում է 2008 թվականի ցուցանիշը: 2009-ին Ղարաբաղում սոցիալական պաշտպանության նպաստները կազմել են մոտ 16 միլիարդ դրամ՝ պետբյուջեի ծախսերի 27.2%-ը՝ 17.4%-ով ավելի, քան 2008 թվականին:
