ՀԱՇՄԱՆԴԱՄ ԱՇԽԱՏԱԿԻՑ ՉԵՆ ՈՒԶՈՒՄ ՈՒՆԵՆԱԼ

Քաղաքապետարանում, նախարարություններում հաշմանդամություն ունեցողների համար աշխատանք չկա

Լեզուների իմացությամբ, համակարգչային գիտելիքներ ու
աշխատելու մեծ պատրաստակամություն ունեցող
Մարիամին ոչ պետական եւ ոչ էլ մասնավոր հիմնարկներում
աշխատանք չեն տալիս:

Հաշմանդամ մարդկանց աշխատանքի ընդունելու դեպքում մեր պետությունը գործատուների համար որոշակի արտոնություններ է սահմանել: Որպեսզի գործատուները շահագրգռված լինեն ու գործազուրկ հաշմանդամին իրենց հիմնարկում աշխատանք տան, պետական միջոցներով փոխհատուցվում է գործատուի վճարած աշխատավարձի 50%-ը: Այսինքն, եթե նվազագույն աշխատավարձ տա, գործատուն մեկ ամսվա համար իր գրպանից հաշմանդամին պետք է վճարի ընդամենը 15 հազար դրամ: Հաշմանդամություն ունեցող շատ ու շատ մարդիկ, որոնք բավականին մեծ ջանքերի շնորհիվ կրթություն, համակարգչային գիտելիքներ են ստացել, լեզուներ են սովորել, որ կարողանան ինչ-որ կերպ դրսեւորել իրենց կյանքում, այսօր ամենուրեք աշխատանք են փնտրում, տարբեր ընկերությունների, օֆիսների ու պետական մարմինների դռներն են թակում, որ գործազուրկ չմնան: Մինչդեռ հաշմանդամ գործազուրկների մասին պաշտոնական տվյալներն արդեն վկայում են, որ այսօր մեր երկրում շատ քիչ ընկերություններ են գնահատում հաշմանդամի կարողությունները եւ նրանց վստահում որեւէ՝ թեկուզ բանվորական աշխատանք:
Ճշտելու համար, թե պետական մարմիններում հաշմանդամների գիտելիքներն ու ունակությունները որքանո՞վ են գնահատում, մենք տարբեր գերատեսչություններից հարցում արեցինք, թե քանի՞ հաշմանդամ աշխատակիցներ ունեն եւ ի՞նչ պատասխանատու պաշտոններ են նրանք զբաղեցնում:
Պարզվում է՝ մեր երկիրը, որը արտոնություններ է սահմանում եւ մասնավոր հատվածին է խրախուսում հաշմանդամին աշխատանքի ընդունել, ինքը օրինակ չի ծառայում եւ պետական ապարատում ընդգրկում է շատ քիչ թվով հաշմանդամ մարդկանց: Պատասխանատու պաշտոններ զբաղեցնելու մասին այստեղ խոսք անգամ լինել չի կարող, որովհետեւ նույնիսկ մեծ աշխատակազմ ունեցող նախարարություններում հաշմանդամության կարգ ունեցող մարդը լավագույն դեպքում աշխատում է ինչ-որ մի կորած բաժնում՝ քիչ աշխատավարձով:
Ինչպես հայտնեցին բնապահպանության նախարարությունից՝ «Մեր կենտրոնական ապարատում ընդհանրապես հաշմանդամներ չեն աշխատում: Հնարավոր է նախարարությանը պատկանող պետական ոչ առեւտրային կազմակերպություններում լինի մեկ-երկու հաշմանդամ, թեեւ դրա հավանականությունը փոքր է: Բացի այդ, երբ մարդիկ գալիս են նախարարությունում աշխատանքի ընդունվելու, թաքցնում են, որ իրենք հաշմանդամության կարգ ունեն, եթե հաշմանդամությունը երեւացող չէ: Այնպես որ, հնարավոր է նախարարությունում կան հաշմանդամներ, պարզապես մենք չգիտենք»:
Հանրային ծառայությունները կարգավորող հանձնաժողովում ոչ մի հաշմանդամ աշխատակից չունեն: Հանձնաժողովում նրանց չի վստահվել անգամ համակարգչային օպերատորական ծառայություններ կատարելու գործը:
Առողջապահության նախարարությունից դժվարացան պատասխանել՝ իրենց մոտ հաշմանդամներ աշխատո՞ւմ են, թե՞ ոչ. «Մեզ մոտ գործի ընդունելիս չեն հարցնում՝ հաշմանդամության կարգ ունե՞ն, թե՞ ոչ: Հետեւաբար, չեն կարող ասել, թե քանի հաշմանդամ են աշխատում կամ առհասարակ ունե՞ն հաշմանդամ աշխատակիցներ»: Հաշվի առնելով, որ մի ամբողջ նախարարությունում հաշմանդամ գոնե մեկ մարդու համար գործ չի գտնվում, ողջունելի է, որ Աջափնյակի թաղապետարանում նույնիսկ 3 հաշմանդամ է աշխատում, ընդ որում՝ նրանցից մեկը առաջատար մասնագետ է, երկուսն էլ՝ առաջին կարգի մասնագետ:
Երեւանի քաղաքապետարանից «Առավոտին» պարզաբանեցին, որ քաղաքապետ Գագիկ Բեգլարյանը Ամանորի տոնական օրերին հայտարարել է, որ հաշմանդամներին մեծ տեղ են տալու: Իսկ թե ներկայումս հաշմանդամ քանի՞ աշխատակից ունեն՝ չպատասխանեցին:
Ֆինանսների նախարարությունից նույնպես չկարողացան ասել, թե իրենց մոտ քանի՞ հաշմանդամ է աշխատում. «Մեր նախարարությունը 600 աշխատակից ունի, բայց թե նրանցից քանի՞սն են հաշմանդամ՝ չգիտենք: Երեւացող հաշմանդամություն ունեցող գիտենք, որ կա, թե նրանք կարգ ունեն՝ ոչ մի տեղ չի նշվում: Նրանք, դիմումից բացի, աշխատանքի ընդունվելիս միայն լրացնում են պետության կողմից սահմանված վարակիչ հիվանդությունների ցանկը, բայց հաշմանդամության մասին մենք չենք իմանում»:
Միայն քաղաքաշինության նախարարությունում են տեղ տվել հաշմանդամներին: Այնտեղ գոնե երկու հաշմանդամ է աշխատում:
Եթե պետական գերատեսչություններում են սահմանափակ կարողություններով մարդկանց այսքան գնահատում, ուրեմն մասնավոր ընկերություններից մեր երկիրը պահանջելու ոչինչ չունի: