ՄԱԿ-ի փորձագետների հաշվարկով, Աֆղանստանի բնակիչները վերջին մեկ տարվա ընթացքում 2,5 մլրդ դոլարի կաշառք են տվել: ՄԱԿ-ի պատվերով կատարված հարցումների արդյունքում պարզվել է, որ կոռուպցիայի բարձր աստիճանը աֆղանցիներին ավելի շատ է մտահոգում, քան՝ անվտանգության եւ գործազրկության հարցերը:
Աֆղանստանի բնակչության ավելի քան կեսը վերջին մեկ տարվա ընթացքում ամենաքիչը մեկ անգամ կաշառք է տվել աֆղան չինովնիկներին:
Ուսումնասիրության տվյալներով, ամեն երրորդ աֆղանցին վստահ է, որ կաշառակերությունը նորմալ երեւույթ է: Հարցումը ի հայտ է բերել նաեւ մի փաստ, ըստ որի՝ աֆղանցիները բացասաբար են վերաբերվում միջազգային կազմակերպություններին: 54 տոկոսը վստահ է, որ նրանք Աֆղանստանում են՝ կաշառք վերցնելով փող վաստակելու համար: «Նման կարծիքի տարածումը սպառնալիքի տակ է դնում բոլոր նրանց գործունեությունը, ովքեր իսկապես փորձում են օգնել այս երկրին»,- եզրակացրել են ՄԱԿ-ի փորձագետները:
ՄԱԿ-ում կարծում են, որ Աֆղանստանում կոռուպցիայի բարձր մակարդակը նպաստում է թմրանյութերի շրջանառության ծաղկմանն ու ահաբեկչության տարածմանը:
