Ռուսաստանի եւ Եվրամիության միջեւ վիզային ռեժիմը կարող է մեղմացվել արդեն առաջիկա կես տարվա ընթացքում: BBC-ի փոխանցմամբ, չորեքշաբթի օրն այդ մասին հայտարարել են ԵՄ-ում նախագահող երկրի՝ ՌԴ-ում Իսպանիայի դեսպան Խուան Անտոնիո Պուժոլն ու Մոսկվայում Եվրահանձնաժողովի ներկայացուցչության ղեկավար Ֆերնանդո Վալենսուելան:
Վերջիններս պարզաբանել են, որ խոսքը կարող է գնալ ռուսաստանցիներին ավելի երկար ժամկետով բազմակի վիզա տրամադրելու մասին: Ինչ վերաբերում է առանց վիզային ռեժիմի հաստատման հնարավորությանը, ապա Վալենսուելայի ասելով՝ դա այլ ժամանակների հեռանկարի հարց է, նաեւ ընդգծել է, թե վիզային ռեժիմի մեղմացումը պետք է երկկողմ բնույթ կրի, որովհետեւ եվրոպացիներին Ռուսաստան մեկնելու վիզա ստանալ եւս հեշտ չէ:
