Հունվարի 16-ին Ապարան քաղաքում նշվեց հին Նոր տարին: Արդեն մի քանի տարի «Նիգ Ապարան» հայրենակցական միության նախաձեռնությամբ մեծ հանդիսավորությամբ նշվում է հին Նոր տարին: Վաղ առավոտից մարդիկ այցելեցին Բաշ Ապարանի եւ Արցախյան հերոսամարտին նվիրված հուշարձան-համալիր, այնուհետեւ հավաքվեցին քաղաքային հրապարակում բացված առատ սեղանների շուրջ՝ միմյանց շնորհավորելու: Իրենց բերք ու բարիքով Ապարան էին եկել ոչ միայն Արագածոտնի մարզի համայնքները, այլեւ հանրապետության այլ մարզերի բնակիչներ: Ասմունքողները, երգուպարի վարպետներն իրենց արվեստը ներկայացնում էին ոչ միայն բեմից: Նրանք նաեւ բազմության մեջ էին, ինչի շարունակությունը հրապարակում վառված հսկա խարույկի շուրջ ծավալված շուրջպարն էր: Մարդիկ միմյանց փոխարինելով պարեցին մինչեւ օրվա վերջ: Բանահավաք Ժորա Գրիգորյանը մեզ ասաց, որ ապարանցիները լավ կռվելուց ու արարելուց բացի, լավ զվարճանալ էլ գիտեն:
