Ծաղկաձորում մեկնարկել է դահուկավազքի Հայաստանի առաջնությունը, որի մասնակիցները միավորներ են ստանում դահուկային սպորտի միջազգային ֆեդերացիայից (FIS): Ամենաարդյունավետ դահուկորդին փետրվարին Կանադայի Վանկուվեր քաղաքում անցկացվելիք ձմեռային օլիմպիական խաղերի ուղեգիր կշնորհվի:
![\"\"](\"https://www.aravot.am/2010/aravot_arm/January/16/p19.jpg\")
Ըստ ԶԼՄ-ների, FIS-ը հունվարի 18-ին հրապարակելու է օլիմպիական վարկանիշ ունեցող մարզիկների անունները, իսկ հունվարի 25-ին ներկայացնելու է արդեն Խաղերի մասնակիցների վերջնական ցուցակը: Հայաստանն այս մարզաձեւում Վանկուվերում կարող է ներկայացված լինել առավելագույնը երկու մարզիկով:
Ծաղկաձորում մրցումների առաջին օրը որոշվեց 1200 մետր արագավազքի հաղթողը: Մեկնարկի ելած 31 մասնակիցների (22 տղա եւ 9 կին) մեջ, որոնք ներկայացնում էին Գյումրին եւ Աշոցքը, չեմպիոնի կոչումը նվաճեցին աշոցքցի 17-ամյա Սերգեյ Միքայելյանը, որն անցած տարի անվադահուկներով դարձել է ուսանողների աշխարհի առաջնության հաղթող, եւ Քրիստինե Խաչատրյանը՝ Գյումրիից:
Երեկ կայանալու էին ազատ ոճով՝ 15 կմ, իսկ այսօր՝ դասական ոճով 10 կմ մրցումները:
