![\"\"](\"https://www.aravot.am/2010/aravot_arm/January/16/p18.jpg\")
Ֆուտբոլի Հայաստանի փոխչեմպիոն «Միկան» հունվարի 4-ից սկսել է նախապատրաստվել մրցաշրջան 2010-ին: Թիմը հունվարի 7-18-ը Ծաղկաձորում անցկացնում է առաջին ուսումնամարզական հավաքը:
«Sportinfo»-ն, վկայակոչելով «Միկայի» մամուլի ծառայությունը, տեղեկացնում է, որ ձմեռային արձակուրդներից հետո թիմին միացել են մի քանի լեգեոներականներ: Նրանք են՝ իսպանացիներ Պեդրո Լոպեսը եւ Ուլիսսես Մոնտենեգրոն, բրազիլացիներ Ալեքսը եւ Էդնեյլը: Հիվանդության պատճառով հիմա թիմի հետ չէ կոտդիվուարցի Բոտի Դեմելը, սակայն նա ընկերներին միանալու է մոտ օրերս: Ակումբը կազմն ուժեղացրել է լիտվացի դարպասապահ Սաուլիս Կլեվինսկասով: Ամենայն հավանականությամբ, թիմ կընդգրկվի եւս մի բրազիլացի՝ Ժունիոր Էդիլսոնը:
Ծաղկաձորյան հավաքից հետո «Միկան», գլխավոր մարզիչ Արմեն Ադամյանի գլխավորությամբ, հունվարի 20-ից փետրվարի 3-ը հավաք կանցկացնի Անթալիայում, որտեղ երեք ընկերական հանդիպում է ունենալու Ղազախստանի «Օրդիբասի», Ուզբեկստանի «Պախտակորի» եւ Ռումինիայի «Ինտերնացիոնալի» հետ: Արտագնա երկրորդ ուսումնամարզական հավաքը նշանակված է Կիպրոսում (փետրվարի 10-24): Այստեղ եւս չորս ընկերական խաղ է նախատեսված, սակայն մրցակիցները դեռ հայտնի չեն: Եվ վերջին հավաքը լինելու է Իսպանիայի Մալագա քաղաքում՝ մարտի 1-15-ը:
Մարզիչները հաստատվել են
ՀՖՖ մամուլի քարտուղարությունը տեղեկացնում է, որ հանրապետության ֆուտբոլի ֆեդերացիայի նախագահ Ռուբեն Հայրապետյանի հրամանով հաստատվել են Հայաստանի մինչեւ 19 եւ 17 տարեկանների հավաքական թիմերի մարզչական կազմերը: Ըստ այդմ, մինչեւ 19 տարեկանների թիմի գլխավոր մարզիչը Սեւադա Արզումանյանն է, օգնականը՝ Աշոտ Բարսեղյանը, դարպասապահների մարզիչը՝ Հայկ Կիրակոսյանը: 17 տարեկանների հավաքականը մարզելու են գլխավոր մարզիչ Սուրեն Չախալյանը, օգնական Ռոման Սիմոնյանը, դարպասապահների մարզիչ Արմեն Ավագյանը:
