![\"\"](\"https://www.aravot.am/2010/aravot_arm/January/16/p14.jpg\")
Ճապոնիայի պաշտպանության նախարար Տոսիմի Կիտաձավան (նկարում) հրամանագիր է ստորագրել Հնդկական օվկիանոսի Արավի ծովային գոտուց ինքնապաշտպանության ծովային ուժերի նավերը դուրս բերելու մասին: Դրանք տեղակայվել էին դեռ 2001թ. դեկտեմբերին՝ Աֆղանստանում «Թալիբան» շարժման եւ «Ալ-Քաիդայի» տեղական կառույցների ջոկատների դեմ ռազմական գործողություններին մասնակցող ամերիկյան ուժերի թիկունքն ապահովելու առաքելությամբ՝ մատակարարել դաշնակից ուժերի նավերն ու ուղղաթիռները անվճար վառելիքով, իսկ դրանց անձնակազմերին խմելու ջրով: Ինչպես փոխանցում է «ԼՁԸՀ-ՁԸհհ»-ը, այս կեսգիշերին լրանում է ճապոնական ռազմածովային ուժերի՝ այդ առաքելությունն իրականացնելու համար սահմանված ժամկետը: Հակաահաբեկչական առաքելությանը մասնակցելու ողջ ընթացքում, նախնական գնահատականներով, Ճապոնիայի պաշտպանության նախարարությունը թվով ութ երկրների՝ առաջին հերթին ԱՄՆ-ի եւ Պակիստանի նավերին տրամադրել է 268 մլն դոլարի մոտ 510 հազար լիտր դիզելային վառելիք եւ մոտավորապես 11 հազար տոննա ջուր: Միջազգային ուժերի ուղղաթիռները ստացել են մինչեւ 1200 լիտր վառելիք:
Ճապոնիայի՝ անցյալ տարվա սեպտեմբերին ձեւավորված նոր կառավարությունը, վարչապետ Յուկիո Հատոյամայի գլխավորությամբ, որոշում էր կայացրել Հնդկական օվկիանոսում իր ինքնապաշտպանական ուժերի այդ առաքելության ժամկետը չերկարաձգելու մասին: Ճապոնիան մտադիր է կոալիցիոն ուժերին օգնել բացառապես ոչ ռազմական համագործակցության հարթության համատեքստում՝ վերականգնել Աֆղանստանի գյուղատնտեսությունը, օգնել «Թալիբանի» նախկին գրոհայիններին ադապտացվել խաղաղ կյանքին եւ այլն, որի համար մտադիր է հատկացնել 5 մլրդ դոլար:
