![\"\"](\"https://www.aravot.am/2010/aravot_arm/January/16/p15.jpg\")
Մոսկվայում հույս ունեն, որ Ուկրաինայում կայանալիք նախագահական ընտրություններից հետո կկարողանան լեզու գտնել այդ երկրի նոր նախագահի հետ, որը Ռուսաստանի հանդեպ «հարգալից եւ անկեղծ քաղաքականություն կվարի»: Այդ մասին, «Newsru»-ի փոխանցմամբ, հայտարարել է ՌԴ ԱԳՆ պաշտոնական ներկայացուցիչ Անդրեյ Նեստերենկոն: «Մոսկվան ուշադրությամբ եւ միանգամայն հասկանալի հետաքրքրությամբ հետեւում է Ուկրաինայում տեղի ունեցող զարգացումներին: Մենք չենք թաքցնում, որ մեզ համար ամենեւին էլ միեւնույն չէ, թե ով է լինելու Ուկրաինայի նոր ղեկավարը եւ ինչպես է նա կառուցելու Ռուսաստանի հետ հարաբերությունները»,- ասել է նա՝ չմոռանալով հավելել, որ, իհարկե, նախագահի ընտրությունները այդ երկրի եւ նրա ժողովրդի սուվերեն իրավունքի խնդիրն են:
Հիշեցնենք, որ Ուկրաինայում նախագահի ընտրությունները տեղի են ունենալու առաջիկա կիրակի՝ հունվարի 17-ին, բայց ինչպես փորձագետները, այնպես էլ ՌԴ ԱԳՆ ներկայացուցիչը կարծիք են հայտնել, թե հնարավոր է, որ այդ ընտրություններն առաջին փուլով չավարտվեն:
