Հայ ազգային կոնգրեսը դիմել է ՀՀ կենտրոնական ընտրական հանձնաժողով եւ վարչական դատարան՝ թիվ 10 ընտրատարածքային ընտրական հանձնաժողովի «անգործությունը վերացնելու» պահանջով։ Ինչպես փոխանցում է «Ազատություն» ռ/կ-ն, Կոնգրեսը վկայակոչել է այն փաստը, որ հանձնաժողովը հունվարի 14-ին հրաժարվել է ընդունել այդ ընտրատարածքում տեղի ունեցած ընտրություններն անվավեր ճանաչելու իրենց դիմում-բողոքը։
Բանն այն է, որ ընտրությունների արդյունքն ամփոփելու ժամկետը լրանում էր երեկ, ժամը 14։00-ը ներառյալ, եւ մինչ այդ պահը ընդդիմությունն իրավունք ուներ դիմում ներկայացնել, սակայն հանձնաժողովը արդեն երեկ կեսօրին որոշում է ընդունել ոչ միայն Արա Սիմոնյանին որպես պատգամավոր գրանցելու մասին, այլեւ, հակառակ օրենքի պահանջին, հրաժարվել է ընդունել պատգամավորության թեկնածու Նիկոլ Փաշինյանի ներկայացուցիչ Պատվական Հովակիմյանի դիմում-բողոքը, որովհետեւ այդ պահին՝ դեռ սահմանված ժամկետը չլրացած, հանձնաժողովն այլեւս տեղում չի էլ եղել: Այն, որ թիվ 10 ընտրատարածքային ընտրական հանձնաժողովը պարտավոր էր անգամ պատգամավորին գրանցելու մասին որոշում ընդունելուց հետո էլ սահմանված ժամկետի ընթացքում ընդունել դիմում-բողոքները՝ ռ/կ-ի հետ զրույցում փաստել է նաեւ ԿԸՀ նախագահ Գարեգին Ազարյանը:
Ի դեպ, երեկ ԿԸՀ-ում թիվ 10-ում Արա Սիմոնյանին՝ որպես պատգամավորի, գրանցման արձանագրության տակ չեն ստորագրել ո՛չ «Ժառանգության» եւ ո՛չ էլ ՀՅԴ-ի ներկայացուցիչները՝ համարելով, որ ընտրություններն այդ ընտրատարածքում պետք է անվավեր ճանաչվեին: Իսկ ՀԱԿ-ը մտադիր է այդ պահանջով դիմել նաեւ ՀՀ Սահմանադրական դատարան:
